Nigina | Blog

Bu holat juda tanish. Oldin ota-onalar o‘qituvchiga ishonishar va bolalaridan mas’uliyat talab qilishardi. Agar kimdir yomon baho olsa, bu uning kamchiliklari deb qabul qilinardi. Endi esa aksincha – ko‘pchilik ota-onalar o‘qituvchini ayblaydi. Ularning fikricha, bola yaxshi o‘qimasa, demak, muammo maktabda yoki o‘qituvchida.

Menimcha, bu noto‘g‘ri yondashuv. O‘qish – bu avvalo o‘quvchining mas’uliyati. Ota-onalar bolalarini qo‘llab-quvvatlashlari kerak, lekin shu bilan birga, ularning xatolarini tushunishlariga ham imkon berishlari lozim. Agar bola har doim oqlansa va ayb boshqalarga yuklansa, u hech qachon mustaqil bo‘lolmaydi.

Ta’lim sifati oshishi uchun ota-onalar, o‘qituvchilar va o‘quvchilar birgalikda ishlashi kerak. Har kim o‘z vazifasini bajarsa, bilim olish ham osonroq va samaraliroq bo‘ladi. O‘qituvchini ayblash bilan muammo hal bo‘lmaydi, muhim narsa – bolaning o‘z kelajagiga javobgarlikni his qilishidir.

"Yaxshi maktabda oʻqiyapti", "Repetitorga boryapti" degani oʻquvchi zoʻr boʻlib ketdi degani emas. Agar o‘quvchining o‘zi intilmasa, bilimga qiziqmasa va mehnat qilmasa, qanchalik kuchli ta’lim olmasin, baribir yaxshi natija bermaydi. Shunchaki darslarga qatnashish o‘z-o‘zidan bilimni oshirib qo‘ymaydi. Muhimi – o‘quvchining harakati va mas’uliyati. Ko‘p hollarda ota-onalar farzandini yaxshi maktabga joylashtirib yoki repetitorga berib, hammasi hal bo‘ldi deb o‘ylashadi. Lekin bu shunchaki boshlanishi. Agar o‘quvchi mustaqil ishlamasa, savol bersa, izlansa, o‘rganganlarini mustahkamlasa, haqiqiy o‘sish bo‘ladi.

Ayrim ota-onalar esa ustozda ayb deyishadi. Lekin o‘qituvchi faqat yo‘l ko‘rsatadi, bilim olish esa o‘quvchining o‘z qo‘lida. O‘qituvchi dars o‘tadi, tushuntiradi, yo‘naltiradi, lekin uni qanchalik qabul qilish va o‘zlashtirish o‘quvchining o‘ziga bog‘liq. Agar bola darsga beparvo bo‘lsa, vazifalarni bajarmasa, hatto eng yaxshi o‘qituvchi ham unga hech narsa o‘rgata olmaydi. Ba’zi ota-onalar farzandining sustligi yoki dangasaligini tan olish o‘rniga, darhol o‘qituvchini ayblashadi. Ularning fikricha, bola yaxshi o‘qimasa, demak, muammo ustozda. Aslida esa har bir o‘quvchi o‘z natijasi uchun javobgar. Ustoz bilim beradi, lekin uni olish yoki olmaslik o‘quvchining qo‘lida.

Shuning uchun ota-onalar faqat o‘qituvchini ayblash o‘rniga, farzandlarining o‘z ustida ishlashiga e’tibor berishlari kerak. Chunki bilim maktab yoki repetitorda emas, balki o‘quvchining o‘z harakatida.

@NiginaKomiljonova

1. Men o‘zbekman – men uchun halollik birinchi o‘rinda turadi.


2. Men o‘zbekman – ortimdan emas, yuzimga gapiriladigan gapni eshitishni xohlayman.


3. Men o‘zbekman – haqiqatni aytishdan qo‘rqmayman.


4. Men o‘zbekman – tanqidni dushmanlik emas, rivojlanish uchun imkoniyat deb bilaman.


5. Men o‘zbekman – aytilgan va’daga, berilgan so‘zga sodiq qolish men uchun muhim.


6. Men o‘zbekman – urf-odatlarni hurmat qilaman, lekin hayotimni ularning asiriga aylantirmayman.

* Post ushbu videodan ilhomlanib yozildi.

@NiginaKomiljonova

#sarhisob Yanvar

1. Erve Le Tellye "Anomaliya"
2. Jeyms Xedli Cheyz "Yarim million dollarlik qilmish"

Oʻz-oʻzingga murabbiy boʻlish - juda kamyob imkoniyat.

® Erve Le Tellye "Anomaliya"

"Oʻqimagan odam oʻqigan odamni ishga oladi" – Haqiqatmi yoki Ertak?

Ko‘pchilik bu fikrni haqiqat deb qabul qiladi, lekin bu har doim ham to‘g‘ri emas. Haqiqat shuki, o‘qish va muvaffaqiyat har doim ham diplom yoki attestatga bog‘liq emas. Hayotda bilimli odam ham, rasmiy ta’lim olmagan odam ham katta natijalarga erishishi mumkin.

Ba’zan o‘qimagan, lekin tadbirkorlik qobiliyatiga ega odam biznes yuritib, mutaxassislarni yollaydi. U biznes yuritish sirlarini tushunadi, risk qiladi, imkoniyatlarni sezadi. Bunday odam ko‘pincha bilimli mutaxassislarga ehtiyoj sezadi va ularni ishga oladi. Ammo bu degani, har doim o‘qimagan odam rahbar bo‘ladi, o‘qigan odam esa faqat ishchi bo‘lib qoladi, degani emas. Ko‘plab muvaffaqiyatli tadbirkorlar ham yaxshi ta’lim olgan va o‘z bilimlari bilan muvaffaqiyatga erishgan. Shuningdek, o‘z sohasida chuqur bilimga ega bo‘lgan mutaxassis ham rahbar bo‘lishi, o‘z biznesini boshlashi mumkin.

Shaxsan oʻzim hozir repetitorlik qilib, ishlasam boʻladi. Menda oʻqituvchilik diplomi yoʻq. Menda A darajadagi sertifikat va tajriba bor. Bakalavr yoki magistr diplomim boʻlmasa ham, bir paytlar fanni oʻqiganman va hozir ham oʻrganishda davom etyapman. Diplom shunchaki maʼlum bir sohani bilishini koʻrsatuvchi hujjat, xolos. Diplom boʻladimi yoki yoʻq, baribir bilimli inson yutib chiqadi. Faqat bilimni hamma har xil usulda oladi.

Muhimi – nafaqat diplom, balki bilim, tajriba va harakat. Kimdir o‘qish orqali, kimdir esa amaliy tajriba orqali muvaffaqiyatga erishadi. Asosiysi, o‘z ustida ishlash va to‘g‘ri yo‘l tanlashdir.

Siz bu fikrga qanday qaraysiz? Fikrlaringizni izohlarda kutaman!

@NiginaKomiljonova

Shu videodagi bolani taniydiganlar bormi? Kim bu?

Xato qilayotganimizni koʻrsatuvchi narsalarni koʻrishni istamaymiz. Inson tabiati shunaqa. Sogʻlom aql bizga begona.

® Erve Le Tellye "Anomaliya"

"Yarim million dollarlik qilmish" asari haqida

Men bu kitobni hozirgina oʻqib tugatdim. Muallifi Jeyms Xedli Cheyz. Kitob detektiv janrida yozilgan va jinoyat olami haqida. Asarda firibgarlik va pul uchun qilingan hiyla tasvirlangan. Kitob juda qiziq va o‘qishga oson. Voqealar tez rivojlanadi, shuning uchun zerikib qolmaysiz. Qahramonlar aqlli va harakatlari oldindan bilinmaydi. Menga kitobning soddaligi yoqdi. Til oddiy, tushunarli. Ammo ba’zi joylari mantiqiy bo‘lib tuyulmasa ham, umuman olganda, syujet yaxshi qurilgan. Jinoyat va sarguzasht janrlarini yoqtiradiganlarga tavsiya qilaman.

@NiginaKomiljonova

"Anomaliya" asari haqida

"Anomaliya" fransuz yozuvchisi Erve Le Tellyening asari boʻlib, 2020-yilda "Gonkour" mukofotiga sazovor boʻlgan. Asar fantastik voqeliklar va real hayot oraligʻida yozilgan boʻlib, unda inson hayotining mohiyati, qarorlarning taqdirdagi oʻrni va taqdirning oʻzgarmasligini oʻrganishga urinish aks etgan.

Men oʻqiganimda, kitobning birinchi oʻrnida voqealar juda oddiy koʻrindi. Bir guruh yoʻlovchilar Nyu-Yorkka uchib borayotgan samolyotda tasvirlanadi va ular har xil sohalardan boʻlgan oddiy insonlarday tuyuladi. Lekin keyin voqealar juda gʻalati boʻlib ketadi: bir xil samolyot ikki marta uchadi va undagi odamlar oʻzlarining dublikatlariga duch keladi.

Asarda juda koʻp qiziqarli savollar qoʻyilgan. Masalan, biz hayotda qanday qarorlar qabul qilamiz va u qarorlar hayotimizni qanchalik oʻzgartiradi? Bu odamlar oʻzlarining ikki xil hayotlariga qarab, qaysi biri yaxshiroq ekanini oʻylab qoladi. Bu meni ham oʻzimning hayotim haqida oʻylashga majbur qildi. Asar odamlarni oʻylashga undaydi, lekin ayni vaqtda baʼzi joylari qiyinroq tushunarli boʻlishi mumkin.

"Anomaliya" men uchun biroz murakkab boʻlishi mumkin, chunki unda siyosiy va ilmiy mavzular ham bor. Lekin men kabi oʻsmirlar bu kitobni oʻqib, boshqa dunyoqarash bilan tanishishlari mumkin. Kitobda hayot, taqdir va oʻzimizning haqiqatimiz haqida oʻylash uchun juda koʻp imkoniyat bor. Menga, asosan, insonlarning oʻzlari bilan ichki kurashlari qiziq boʻldi.

Umuman olganda, "Anomaliya" men uchun qiziqarli boʻldi, lekin uni toʻliq tushunib olish uchun hali koʻproq oʻqish va oʻylash kerak deb oʻylayman.

@NiginaKomiljonova

Kimningdir sen bilan qay darajada ishi bor-yoʻqligini anglashing uchun butun umring kamlik qiladi.

® Erve Le Tellye "Anomaliya"