ҚАРАҚАЛПАҚСТАН   БАЙРАҒЫ

Халқым  көрип  талай  заман  тарлығын,
Тилин  жойтпай, урп - әдетин,  барлығын,
Сақлап  келген  толы  кеўил  сандығын,
Ашқанда -  жарқ еткен   Байрағым  мениң.

Заман  руўхында  жаңа тус алып,
Бахыт  самалынан  еркин куш алып,
Көк  реңи  аспан  менен  ушласып,
Турғанда - журт  таныр  айдарым  мениң.

Саўлатымсаң,  ғайратымсаң  қолымда,
Сен - айбатым,  намысым да, арым да.
Сары  рең –саҳра , шөлим  сағымда,
Зер липаслы,  алтын  сайларым  мениң.

Жасыл  рең – жасыл далам, жайнаған,
Жанлы өмир, жаслар  күлип  ойнаған,
Бес қалам  бар - бес жулдызды   сыйлаған,
Атқан таңдай  ашық  дийдарым   мениң.

Ярым ай- руўхым, кеўлим қуяшы,
Ата-бабалардың нурлы   мийрасы,
Күш алар көркиңнен Әмиў жағасы,
Жарқырап, желбире  Байрағым мениң! 

  Жуманияз ӨТЕНИЯЗОВ
Өзбекстан ҳәм Қарақалпақстан
Жазыўшылар Аўқамы ағзасы, шайыр.
12.12.2021