"MILLIY TIKLANISH" QARAQALPAQSTAN RÁSMIY BETI

Жуманияз   ӨТЕНИЯЗОВ           
         ЖАҢА  ЖЫЛҒА     

Жаңа жыл жеткенге Ҳақтың саўғасы,
Жан татып көрмеген жәннет  мийўасы,
Оқылмаған китап, жаңа жыр басы,
Жаңа ойлар, жаңа  әрман келип тур.

     Тиллә  таслар  ерип Тебинбулақта,
     Металлар сыңғыры жағар қулаққа,
     Темир  жол қурылып, жақын-жыраққа,
     Жүгиңе  қарыйдар  кәрўан келип тур.

Мойнақ-журт таныған  алтын  айдарым,
Аппақ  шағаладай  жаңа  жайларым.
Бозатаўға  тиклеп,  түскен  байрағын,
Жолларды  дүзетер дәрман келип тур.

     Төрт  түлик мал  жайлап Тахтакөпирде,
     Қызыл қум  жуўсаны  дөнип  әтирге,
     Қаратерең  бойлап  таза  катерде,
     Сайранлап жүзгендей  дәўран  келип тур.

«Нөкис Сити»  саўлат  берсе қалаға,
Мектеплер нур  қуяр  ҳәр бир балаға,
Пайдасы  мың  есе қайтар  Ўатанға,
Илимниң  жемиси  молдан  келип тур. 

     Ашылып Үстирттиң  жаңа  кәнлери, 
     Жулдыздай жарасып жанар  түнлери.
     Қыста  қыяр писип,  лимон гүлледи,
     Роботты жумсар заман келип тур.

Майсыз машиналар  жүрип жүк пенен,
Ертеңге ис қалмас  бүгин питпеген,
Қағазсыз хат, пул жиберсе  ток пенен,
Көз ашып  жумғанша саған  келип тур.

     Кел жаңа жыл, күшли депутат  болып,
     Қала, аўылларым тең абат болып,
     Тарийхта қалғайсаң жақсы ат болып,
     Жеткен  жүреклерге  илҳәм келип тур...