Sokin kuyni eshita turib,
Oqayotgan ko’z yoshlaringni
Aylatirsang xotiralarga,
Anglamaysan baribir ammo
Baxtmi va yo biroz qayg’uli
Sog’inilgan odamni sevish.

Tashqarida bahor deysan-u,
Termulasan soat miliga.
U kelmagan ko’chalar rangi
Kirib kelar nigohlaringga
Va aylanar og’riqli kunga…

Ammo,
uchish mumkin xotiralarda,
Sevish mumkin
u keltirgan gullar iforin
U bildirgan baxt kabi
Bag’ringga bosib…
Va bu lahzalarda
qorishib ketar
sog’inishning ming qiyofasi…

Bu she’rni siz bir qadar mayin,
Bir qadar sokin,
Bir qadar ezgin
Va bir qadar farah aralash
Yuzingizni botyotgan quyosh
va
Sevgilingiz xayollariga
tutgancha o’qing
Va mo’jiza kutmay zarracha.
Va sizni men bag’rimga bosib,
Tabriklayman balki ilk daf’a
Bahor misol
bir qadar mayin,
Bir qadar sokin,
Bir qadar ezgin
muhabbat bilan…

@FeruzaXayrullayeva