O‘zbekiston Yozuvchilar uyushmasi

She’riy lahzalar

MEN HAM

Men ham umid bilan safarga chiqib,
Uzoq manzillarga ko‘z tikkan jonman.
Birda Sirdan toshib, birda tutoqib
Katta yo‘lga chiqqan
Kichik karvonman.

Bobomning armonli zamonasida,
Ustodimning tanho taronasida,
Otamning alamlp pok siynasida
Ushalib-ushalmay
Qolgan armonman.

Magar kimni ko‘rsam ko‘zlari yoshli,
Unga qarab tursa bir bag‘ri toshli,
Bir yaltoqning bo‘lsa bag‘ri quyoshli
Qing‘irga kun bermas
Qirg‘in – baronman.

Birga maftun bo‘ldim, birga havasda,
Sohibi suxanga bu jon payvasta.
Ko‘rgulik bor yerda ko‘ngil shikasta
Davosi topilmas
Dardga darmonman.

Kimlarga ko‘klam – qish, kimga qish – yozdir,
Kimga ko‘lmak – teran, ummon sayozdir.
Boz turib qarg‘aning umri darozdir…
Lochinmas, Quzg‘unga
Kelgan qironman.

Dardsiz yashamoqlik – dardmandlik asli,
Bahordan beg‘ubor – bolalik fasli.
Bu dunyoni ko‘rsam gulga qiyosli:
Bog‘li, bog‘chaliman
Ko‘ksi osmonman.

Dunyo yaratmoqlik dunyo demakdir,
Matlabsiz kimsaning siynasi chokdir.
El-yurtga muhabbat – buyuk idrokdir
Bu yurt – bu Vatansiz.
Behol, bejonman.

Menga muabbir ham ta’bir kerakmas,
Ta’nali, ta’mali kabir kerakmas,
Alhol, zavoli bor sabr kerakmas.
Minnatli madadga
Toqatsiz jonman.

Shu yorug‘ kunlarni ko‘rolmay ketgan,
Na manzil, na murod-maqsadga yetgan,
El-ulus turganda o‘zin unutgan
Zotlar bag‘ridagi
Bir qatra qonman.

Darig‘ tutma mehring mendin, tabiat,
Judo qilsang-da gar jondin, tabiat,
Lek shuni so‘rayman sendin, tabiat;
Aro yo‘lda qo‘yma
Men ham mehmonman.

To‘ra SULAYMON

TAʼZIYA

   O‘zbekiston Yozuvchilar uyushmasi jamoasi va ko‘p sonli aʼzolari O‘zbekiston Yozuvchilar uyushmasi raisining birinchi o‘rinbosari Minhojiddin Mirzoga akasi Zaynobiddin Hojimatovning vafoti munosabati bilan chuqur hamdardlik bildiradi.

   Janoza bugun 28-aprelda peshin namozidan keyin Andijon shahar Forobiy mahalla fuqarolar yigʻinida joylashgan Imomi Aʼzam masjidida oʻqiladi.

O‘zbekiston Yozuvchilar uyushmasi Axborot xizmati

Kitobxonlik haftaligi

“O‘ZBEKISTON – KITOBXONLAR YURTI”

  Samarqand viloyati Urgut tumanida “O‘zbekiston – kitobxonlar yurti” haftaligi doirasida poytaxt Toshkentdan borgan ijodkorlar bilan uchrashuvlar bo‘lib o‘tdi. Dastavval Sharof Rashidov nomidagi Samarqand davlat universitetiga O‘zbekiston Yozuvchilar uyushmasi tomonidan nashr etilgan eng sara yangi kitoblar tuhfa etildi.
   Shuningdek, Samarqand davlat universiteti Urgut filialida O‘zbekistonda xizmat ko‘rsatgan madaniyat xodimi, shoira Zulfiya Mo‘minova, O‘zbekistonda xizmat ko‘rsatgan jurnalist, “Zarafshon” va “Samarkandskiy vestnik” gazetalari bosh muharriri, shoir Farmon Toshev, taniqli shoir Aziz Said, O‘zbekistonda xizmat ko‘rsatgan jurnalist, shoir Salim Ashur bilan uchrashuv bo‘lib o‘tdi. Samimiy ruhda o‘tgan anjumanda shoirlar ustozlar va talabalar huzurida yangi she’rlaridan o‘qib berdilar. Urgut tumani ijodkorlari, universitet professor-o‘qituvchilari, ijodkor talabalar kitob va kitobxonlikning inson, xususan, yoshlar ma’naviyatini oshirishdagi  tarbiyaviy ahamiyati haqida o‘z mulohazalarini bildirdilar.
   Urgut tumani axborot resurs markazida o‘tgan uchrashuv jarayonida mazkur kutubxonaga O‘zbekiston Yozuvchilar uyushmasi tomonidan nashr etilgan besh yuzdan ortiq kitoblar sovg‘a qilindi. Tadbirga to‘plangan tuman faollari, nuroniylar va xotin-qizlar vakillari, talaba yoshlar, o‘quvchilar huzurida shoirlar Zulfiya Mo‘minova, Farmon Toshev, Aziz Said, Salim Ashur o‘z she’rlaridan o‘qib berishdi.O‘zbekiston axborot agentligi bosh direktori, O‘zbekistonda xizmat ko‘rsatgan jurnalist, Oliy Majlis senati a’zosi, shoir Abdusaid Ko‘chimov, Urgut tumani hokimi Botir Jabborov mazkur tadbirda ishtirok etib, mamlakatimizda kitobxonlikni targ‘ib etish, ma’naviyat va ma’rifatni yuksaltirish  borasida amalga oshirilayotgan ishlar xususida so‘zladilar.

O‘zbekiston Yozuvchilar uyushmasi
Axborot xizmati