VOBKENT.UZ | Rasmiy kanali

VOBKENTDA USTOZ VA MURABBIYLAR BAYRAMI KENG NISHONLANDI.

Shoirga dedilar: siz – baxtli inson,
El-yurt ardoqlaydi hamma taniydi,
Shoir javob berdi: menda bir armon:
Muallim desalar meni, qaniydi...

Abdulla Oripov

Darhaqiqat, shoir haq. Qaysi kasb egasi boʻlishidan qatʼiy nazar ularga himmati baland, mehri daryo ustozlar bilim beradi, tarbiyalaydi. Har yili 1-oktyabr “Ustoz va murabbiylar kuni” munosabati bilan mamlakatimizning barcha joylarida bayram tadbirlari keng nishonlanmoqda. Quvonchli tomoni shundaki, ustozlar bayramining dam olish kuni sifatida eʼtirof etilishi barchani nihoyatda mamnun etmoqda.

Yurtimizning barcha joylarida boʻlgani singari Vobkent tumanidagi "Osiyo" tantanalar bazmgohida ham bayram har qachongidan ham keng va fayzli nishonlandi. “Ustoz” nomi bilan ataluvchi bazmgohga taklif etilgan mehnat faxriylari, xalq taʼlimi aʼlochilari, oʻzlarining yutuqlari bilan turli tanlovlarda gʻolib chiqqan pedagoglar bayramni shodi-xurramlik bilan kutib oldilar. Tadbirda ishtirok etgan tuman hokimi F.Umarov yigʻilganlarni bayram bilan muborakbod etar ekan, keyingi yillarda mamlakatimizda xalq taʼlimiga alohida eʼtibor berilayotganligini, bundan pedagoglar nihoyatda mamnun ekanligini alohida taʼkidladi.
Bugungi kunda tumanda jami 43 ta taʼlim muassasalari mavjud boʻlib, shundan, 42 ta umumtaʼlim maktablari, 1 ta matematika faniga yoʻnaltirilgan Oʻzbekiston Respublikasi Prezidenti huzuridagi ixtisoslashtirilgan agentlik maktabi va 1 ta “Barkamol avlod” bolalar maktabi mavjud boʻlib, ushbu maktablarda jami 21800 nafar oʻquvchilar taʼlim olib, ularga 2268 nafarga yaqin oʻqituvchilar taʼlim-tarbiya berib kelmoqda.

Davlat maktabgacha taʼlim tashkilotlari soni 36 ta, nodavlat maktabgacha taʼlim tashkilotlari soni 97 tani tashkil etadi. Hozirda tumanda jami 3-7 yoshli bolalar soni 11706 nafarni tashkil etib, shundan, 9200 nafari yoki 78,5 foizi maktabgacha taʼlim tashkilotlariga qamrab olinishiga erishildi.
Umumtaʼlim maktab oʻqituvchilari toifasiga koʻra tahlil qilinganda tumandagi 2268 nafar pedagog xodimlardan 450 nafar yoki 19,8 foiz oliy toifali, 519 nafar yoki 22,8 foiz I toifali, 573 nafar yoki 25,2 foiz II toifali, 726 nafar yoki 32 foiz mutaxassis oʻqituvchilar faoliyat olib bormoqda.
Keyingi yillarda butun mamlakatimizda boʻlgani kabi Vobkent tumanida ham taʼlim muassasalarining moddiy-texnik bazasini mustahkamlash, ularni zamonaviy qiyofaga keltirish borasida keng koʻlamdagi ishlar amalga oshirildi.
Joriy yilning oʻzida Investitsiya dasturi doirasida 3 ta (16-, 17-, 21-maktablar) umumtaʼlim muassasalarida 15,4 mlrd.soʻmlik markazlashgan mablagʻlar hisobidan hamda Shirin MFY hududida 14-sonli umumtaʼlim maktabining boʻsh turgan binosida qarib 1 mlrd.soʻm mablagʻlar evaziga yangi zamonaviy qiyofaga keltirilib oʻquvchilar ixtiyoriga topshirildi.
Shu bilan bir qatorda joriy yilning oʻzida mahalliy byudjet mablagʻlari tumanda jami 7,3 mlrd.soʻm mablagʻlar hisobidan 24 ta taʼlim muassasalarini taʼmirlash, zaruriy moddiy-texnik jihozlar bilan taʼminlash ishlari ham amalga oshirildi.
Kelgusidagi marralarni kattaroq olish maqsadida tumanning “Xajuvon”, “Shanba” hamda “Koʻlxatib” mahallalar hududida umumiy qiymati 10,5 mlrd.soʻmga teng 3 ta 90 oʻrinli davlat maktabgacha taʼlim tashkilotlari qurilish ishlari boshlandi. Bu oʻz navbatida tumanda 3-7 yoshli bolalarning qamrov darajasini 87 foizga yetkazish imkonini yaratadi.

Shuningdek, bir guruh ilgʻor pedagoglarga esdalik sovgʻalari hamda tashakkurnomalari topshirildi.

Bayramning shukuhli oʻtishida tumandagi Madaniyat markazining xonandalari tomonidan kuylangan dilrabo kuy-qoʻshiqlar ishtirokchilar tomonidan qarsaklar bilan olqishlab turildi.
Bir soʻz bilan tumanda boʻlib oʻtgan ustozlar bayrami har jihatdan fayzli va shukuhli oʻtganligi bilan ahamiyatlidir.

😎😎😎😎😎😎😎 ijtimoiy sahifalariga obuna bo‘ling

✅Telegram| 💬Facebook| 📹@vobkentuz5284' rel='nofollow'>Youtube|🌍Web-sahifa