Sabitov ©️

Qatar va Saudiya Arabistoni nafaqat futbolda, balki butun sport olamida katta raqobatga kirishishdi.

Osiyo kubogi-2023 - Qatar
Osiyo kubogi-2027 - S. Arabistoni

Jahon chempionati-2022 - Qatar
Jahon chempionati-2034 - S. Arabistoni

Osiyo o’yinlari-2030 - Doha
Osiyo o’yinlari-2034 - Ar Riyod

@sabitov_co

O’zbek kopiraytingida kam uchraydigan shedevr! Mazza qildim. Aviasales - malades!

@sabitov_co

O’zim ham kanal kuzatuvchisi yozganidan keyin ahamiyat beribman (odatda “must have” (bo’lishi shart bo’lgan) narsalarni tekshirmayman, “attention to detail” (detallarga e’tiborli bo’lish) qobiliyatimga esa shubha qilmayman =) ). Eron murabbiyning imzosi haqida yozibman-u, UFA grafikasida bosh murabbiyimizning kimligi haqida hech nima yozilmaganligini ko’rmabman. Taxminan murabbiy ismi keltirilishi kerak bo’lgan joyda esa “Uzcard” logosi turibdi. Marketing ishlagani yaxshi, lekin bu tarkib (va natijaga) javobgar shaxsning ism-familyasi ham keltirib o’tilsa yomon bo’lmasdi.

@sabitov_co

So’nggi yarim yillikda to’liq frilansing (masofadan ishlash)ga o’tganman. Orada 1 oycha “Sport TV”ga borib ishladim va bir vaqtning o’zida, onlayn va offlayn ish rejimlarini solishtirish imkoniyatiga ega bo’ldim. 6 oylik shaxsiy tajribamga tayanib, frilanser bo’lib ishlashning asosiy afzalliklari sifatida quyidagilarni keltirishim mumkin:

• Siz grafikka emas, grafik sizga moslashishi mumkin. Asosiysi dedlaynlarga qat’iy amal qilinsa bo’lgani;
• “Oila-ish” yoki “ish-o’qish”da balansni ushlash ancha osonlashdi;
• Sayohatlar uchun mehnat ta’tilini kutish shart emas. Noutbuk va internet bo’lsa kifoya, dunyoning istalgan nuqtasidan turib, vazifalarni topshirish mumkin;
• Hisob-kitoblarga ko’ra, an’anaviy 8 soatlik offlayn rejimidagi toza ish vaqti o’rtacha 4 soatni tashkil etadi. Ya’ni, siz ofisda 4 soatni shunchaki choy damlash, kofe ichish, hamkasblar bilan chaq-chaqlashish yoki Youtube/Google’ni titkilash bilan (behuda) o’tkazib yuborasiz. Frilansingda esa konkret ish vaqtingiz va dam olish soatlaringiz ancha shaffofroq. Vaqtni hisob-kitobli sarflashga odatlanasiz;
• Bir vaqtning o’zida bir-biriga o’xshamagan bir nechta loyihalarda qatnashish imkoniyati. Tabiiyki, bu daromadlarning ham oshishiga yordam beradi =)
• Diversifikatsiya. Ya’ni, sizda mijozlar (moliyaviy manbalar)ning ko’p bo’lishi - bitta ish joyiga qaram bo’lib qolmaslikni ta’minlaydi. Biroq, unutmaslik kerakki, ish (mijoz yoki buyurtma)siz qolib ketish fobiyasi bo’lmasligi uchun esa raqobatdosh bilim va ko’nikmalarga ega bo’lib, tinmay o’z ustingizda ishlashingiz kerak.

Ayni vaqtda o’zim aviakompaniya, logistika, sport va futbol sohalaridagi mahalliy kompaniyalar uchun doimiy frilans grafik va UI dizayner bo’lib ishlab kelyapman. Alohida buyurtma-loyihalar ham bor. Quyidagi havola orqali esa tayyorlagan ishlarimning ma’lum bir qismi bilan tanishishingiz va baho berishingiz mumkin: be.net/husansabitov

Ha, aytgancha, qiziqarli loyihalar bo’lsa hamkorlikda ishlashga tayyorman. Murojaat manzilim — @husansabitov

@sabitov_co

Yurtimizda qurilishi aytilayotgan atom elektr stansiyasi (AES) mavzusi kun tartibimizdagi asosiy mavzulardan biri ekan, men ham bu bo’yicha ba’zi ma’lumotlarni ulashmoqchiman.

Rivojlangan dunyoda (o’zbekchasiga - “chirigan g’arb”da) AES qurish necha pulga tushayotgani, uning samaradorligi va bunga teskari proporsional ravishda korrupsiya va oligarxiya urchigan, xalq oldida bir gramm ham hisobdorlik his etilmaydigan o’lkalarda qurilayotgan/qurilishi aytilayotgan AESlarni solishtiramiz.

Amerikaning Jorjiya shtatidagi 4 reaktorli Vogtl AESining faqatgina birinchi va ikkinchi energiya blokining o’zi 2302 MVt quvvatga ega. Bu bir vaqtning o’zida 500 000 xonadon va biznesni uzluksiz elektr-energiyasi bilan ta’minlash uchun yetarli. 1987-89 yillarda qurib bitkazilgan ushbu AESning ikki energiya bloki uchun o’sha vaqtda $8,87 mlrd AQSh dollari sarflangan, hozirgi inflyatsiyada bu $19 mlrd dollarga teng bo’ladi.

Bizda qurilishi aytilayotgan AES kam quvvatli bo’lib, 330 MVt qiymatga ega (Amerikanikidan quvvati salkam 8 baravarga kamroq) va taxminan 220 000 xonadon va biznesni energiya bilan ta’minlashi aytildi. Qurish xarajatlari esa $11-15 mlrd AQSh dollari atrofida bo’lishi taxmin qilinmoqda. Hozircha, shishirilmagan holatda shunday raqamlar. 10-15 yilda bu summa $20 mlrd dan oshib ketsa ham shaxsan men ajablanmayman.

Endi matematik hisob-kitoblarga o’tsak — AES energiyasidan foydalanish aynan o’sha AES energiyasi yetib borgan O’zbekistondagi har bir xonadon/biznes vakillari uchun $50 000 ga tushmoqda (agar AES qurish bizga eng arzon holatda $11 mlrd ga tushsa). Ya’ni, tushunarliroq bo’lishi uchun, O’zbekistonda 220 000 xonadon/biznesdan $50 ming dollar yig’ib olib, $11 mlrd ga AES qurishmoqchi. Sal avval yuqorida keltirilgan AQShdagi AES esa har bir xonadon uchun $38 000 ga tushgan. Oddiy amerikalikning 38 ming ishlab topishi qayoqda-yu, o’zbekistonlikning 50 ming ishlab topishi qayoqda… Qimmat va samaradorligi u qadar katta bo’lmagan, aksiga olib, xavfsizlik va ekologik nuqtayi nazardan ko’plab mavhumliklarga ega bunday loyihaning amalga oshishi - faqatgina pudratchi (RosAtom) va (afsuski) o’zimizdagi ayrim kishilarning manfaatiga xizmat qiladi. Xalqqa esa na arzon energiya, na farovonlik bor, bo’yniga ilingan qarzlar qoladi xolos.

P/S: Tendersiz, jamoatchilik fikrini zarracha inobatga olmay, bosqinchi va energo-shantajchi mamlakatga neft-gaz sohamiz qolib, endi xavfsizligimizni ham ishonib topshirsak, holimizga voy.

P/P/S: Qo‘shni Qozog‘istonda AES qurish uchun to‘rtta davlat - Janubiy Koreya, Rossiya, Xitoy va Fransiya saralashdan o‘tganini ma’lum qilindi (#).

Ha, biz faqat futbol va boksda qozoqlardan ildamlasak yetarli, qolgan ishlarda yaqin 40-50 yilda ularga yeta olmasligimiz aniq bo’lib qoldi.

@sabitov_co

Oxirgi vaqtlarda ijtimoiy tarmoqda passivlashdim, futboldan bir muncha uzoqlashdim va buni qisman o’zim xohlab amalga oshirdim. Ayni paytda ko’proq vaqtimni futboldan muhimroq bo’lgan boshqa ishlarga qaratganman. Tahlil, bahs-munozara va qimmatli vaqtimizni sarflashimiz mumkin/shart bo’lgan ishlar ko’p. Futbol esa shunchaki o’z o’rnida — hordiq chiqarish instrumenti bo’lib qolgani yaxshi.

* * *

San’atimizdan qolishmaydigan futbolimizdagi “dedi, dedilar”, muhokamasi tugamaydigan hakamlik mavzusi-yu, liderlarning kuchsizlanishi evaziga paydo bo’lgan va “ulug’lanayotgan” intriga haqida yozgim yo’q. Mensiz ham bu haqida yozayotganlar yetarli.

* * *

Yangi loyihalar ustida bosh qotiryapman. Vaqt masalasini hal qilib olsam, foydali kontentlar tayyorlashni boshlayman (Xudo xohlasa). Hozircha esa ushbu kanalda umumjamiyat hayotiga oid o’z qarashlarimni, pozitsiya va mulohazalarimni, hamda qiziqarli ma’lumotlarni yozib borish niyatidaman. Xuddi avvalgidek.

Birga ekanligingiz uchun rahmat!

@sabitov_co