Ketsam...
xiyonatga yo'yma, iltimos,
Hech nima bo'lmagan
axir, bizlarda.
Shunchaki, nigohlar
to'qnashgan, xolos,
Nada ishq, yo nafrat
yonmas ko'zlarda.
Ketsam...
jinoyatga yo'yma, iltimos,
Sochingga tegmagan
barmog'im xatto.
Senga ko'zim tekkan,
tasodif, bexos,
Ketishim - mavhumlik,
qolmog'im - xato.
Axir, yo'lovchimiz
bor-yo'g'i bizlar,
Bor yo'g'i milyon bor
kelganmiz to'qnash.
Qara, metrodagi
juft temir izlar,
Bizning qismatimiz
shularga o'xshash.
Sen meni kutasan,
aniq, begumon.
Men esa o'tolmam
chiziqdan nari.
Sen tomon gunohdir,
gunoh men tomon,
Birinchi bekatda
tugaydi bari.
Ketsam,
Qiyomatga yo'yma iltimos...

M.Nazarov