Qo'rqaman


Men yo'lbarsdan qo'rqmayman,
Chumolidan qo'rqaman.
- Aybim ne, ezding? -- dega
Savolidan qo'rqaman.

Men qilichdan qo'rqmayman,
Til tig'idan qo'rqaman.
Dilga solgan dog'ining
Og'rig'idan qo'rqaman.

Miskinlikdan qo'rqmayman,
Boyib ketsam qo'rqaman.
Tor ko'prikda yuk bosib,
Toyib ketsam qo'rqaman.

Men oz bilsam, qo'rqmayman,
Ko'proq bilsam, qo'rqaman.
Nafs rayi deb ilmni
Uvol qilsam qo'rqaman.

Itlar hurar qo'rqmayman,
Karvon to'xtar, qo'rqaman.
Berk yo'llarni kim ochar?
Sarbon uxlar, qo'rqaman.

Men murdadan qo'rqmayman
Mudroqlikdan qo'rqaman.
Marddan chiqmas yomonlik,
Qo'rqolardan qo'rqaman.

G'ofil: "Qo'rqma!" desa ham,
Dam-sasidan qo'rqaman.
Haqni yod etmay olgan
Nafasidan qo'rqaman.

Devdan qo'rqmayman deyman,
Lekin zimdan qo'rqaman.
Chunki dev o'z ichimda,
Men o'zimdan qo'rqaman.

Odamiydan qo'rqmayman,
Nokaslikdan qo'rqaman.
Qo'rqit meni, Xudoyim,
Qo'rqmaslikdan qo'rqaman!



Fozil guruhi, "Qashqirlar makonida solihlar tomon"



Sizlar nimadan qo'rqasizlar?....