MILLIY ONA TILI

#esse
Zamonaviylashib borayotgan dunyoda yashar ekanmiz, insonlar qulay hayotga o’ch bo’lib ketmoqda, ayrimlar o’zini yaxshi va qulay his qilgan yerlarni vatan tutib yashayotgan bo’lishsa, boshqalar inson tug’ilgan joyidagina rohat va baxtga erishadi deb hisoblashadi. Aslida, ushbu fikrlarning qaysi biri hayotga tatbiq qilinsa, inson baxtliroq turmush kechiradi?
Birinchi qarash tarafdorlarining fikricha, birinchidan, inson bir marta dunyoga kelar ekan, har kimning tinch , qulay va baxtli yashashga haqi bor. Ikkinchidan, hozirgi kunda juda ko’p mamlakatlar urushlar , ehtiyojlarning qondirilmasligi, suv manbalarining yetishmasligi kabi muammolar bor va ko’plab insonlar shu yerlarni tark etib boshqa joylardan o’z baxtlarini qidirishmoqda. Masalan, mening yaqin do’stimning ishlari O’zbekistonda rivojlanmadi va u faoliyatini chet elga ko’chirdi , hozir u yerda baxtli va farovon turmush kechirayotgan namunali o’zbek madaniyatini yoyayotgan shaxslardan biridir. Ammo baribir “O’z yerim –o’lan to’shagim” deganlaridek bu har kimda har xil.
Tarozining ikki pallasi bo’lganidek, fikrlarning ham ikki tomoni bor. “O’zga yurtda shoh bo’lguncha o’z yurtingda gado bo’l” ,-- deydi donolarimiz. Avvalo, inson o’z tug’ilgan joyidagini osoyishtalikni his qiladi va tinch yashaydi; shuningdek, bizning tug’ilgan joyimiz bir umr ongimizda saqlanadi va biz qayerda umr kechirmaylik bolalik xotiralari bizni aslo tark etmaydi hamda bir kun o’sha tuproqqa qaytamiz; qolaversa, siz kim bo’lishingizdan qat’iy nazar sizni borligingizcha qabul qiladigan maskan bu tug’ilgan joyingizdir.Jumladan, chet elda umrguzaronlik qilayotgan yaqin birodarim tez orada har qanday sharoitlarni tashlab o’zimizning qishloqqa qaytishni istayotganini, odamlarimizni, o’zbekchiligimizni sog’inganini aytdi.
Mening fikrimcha, tug’ilgan joyda baxt qurish kerak, chunki senga tirgak bo’lgan makonni rivojlantira olmasang, unga kerak bo’la olmasang, hech kimga kerak bo’lmaysan.
Xulosa o’rnida shuni aytish mumkinki, baxt, avvalo, o’z diyoring, o’z eling, o’z oilangdir. Agar boshqa joyda farovon yashash baxt keltirganda, Mirzo Bobur, Navoiy, Furqat o’zining g’amga to’la she’rlarini bitmagan bo’lar edi. Zero, “Ona yurting –oltin beshiging”.


© Abdullajon Niyozmatov

Kanalimizga yaqinlaringizni taklif qiling 👇👇👇
@essenamuna

Oldin bizga keyin boshqalarda😅

#esse

Hukumatimiz tarafidan sportga berilayotgan e’tibor yuqori. Yurtdoshlarimizning ayrimlari bu e’tibor to’g’ri yo’naltirilmoqda deyishsa, boshqalari bu mablag’lar ta’limga tikilishi va ushbu tizim rivojlantirilishi zarur deyishadi. Bu sohalardan qaysisiga ko’proq moliyaviy rag’bat berilsa, yurtimiz kelajagi, millatdoshlarimiz uchun yaxshi bo’ladi?
Bugungi kunda yurtimizda sport tobora rivojlanib borar ekan, albatta, uning ishqibozlari ham ko’payib boraveradi va mana shu toifa ushbu sohaga pul ajratish to’g’ri qaror deyishadi va buni quyidagi dalillar yordamida isbotlashadi.Birinchidan, “sog’ tanda sog’lom aql” deganlaridek, sport jamiyatimiz a’zolarining nafaqat tanasiga , balki ongi va ruhiyatiga ham ijobiy ta’sir ko’rsatadi; ikkinchidan,biz farzandlarimizni sog’lom qilib tarbiyalashni bosh maqsad qilgan ekanmiz, bunga faqat sport bilangina erishishimiz mumkin; uchinchidan, dunyo miqyosida g’olib bo’layotgan yoshlar bugun yurtimiz bayrog’ini ko’kka ko’tarishmoqda. Masalan, Bahodir Jalolov, Diyora Keldiyorova, Isroil Madrimov, Ulug’bek Rashidov kabi sportchilar yurtimiz yoshlari uchun bugun katta ibratdir va mening jiyanim ham sport bilan shug’ullanadi va hozirda Tailanddagi musobaqada yurtimiz sharafini himoya qilmoqda
Ammo sportga ko’proq mablag’ ajratish tufayli yurtimizning iqtisodiy va harbiy qudrati zaiflashmasligi zarur.
Masalaga boshqa tomonda yondashadigan bo’lsak, ta’lim tizimini rivojlantirish tufayli hozirda Yaponiya, Singapur, Finlandiya kabi davlatlar dunyo miqyosida taraqqiyotga erishdi va aynan ikkinchi qarash tarafdorlari bunga quyidagilarni sabab qilib keltirishadi. Avvalo, “Najot –ta’limda, najot –tarbiyada, najot -bilimda” ekan, biz aynan shu soha orqali millatimizning madaniy va ilmiy jihatini yuksaltirishimiz mumkin, qolaversa, ayni vaqtda dunyo - iqtisodiy va siyosiy o’yinlar maydoni, bu maydonda ilm jihatidan taraqqiy eta olgan mamlakatlargina omon qola oladi, bas shunday ekan, ushbu yo’nalish rivojida mablag’ni ayab bo’lmaydi, bugun ta’limga tikilmagan pullar, ertaga jinoyatchilikning oldini olish uchun sarflanadi.
Jumladan, Yaponiyada yoshlar ta’limi uchun davlat pulining yarmi sarflanadi va aynan yaponlar zamonamizning eng qudratli davlatlaridan biridir.
Mening fikrimcha, ta’limga e’tibor qaratish - eng to’g’ri qaror, chunki boshqa davlatlardan siyosiy, iqtisodiy, harbiy jihatdan ortda qolmaslik uchun shu soha vakillarini qo’llab- quvvatlash kerak.
Xulosa o’rnida shuni aytish mumkinki, ta’limga tikilgan sarmoya ko’p muammolarning oldini olsa ham, sportga nisbatan e’tiborni susaytirib qo’ymaslik zarur, Zero, ta’lim va sport qushning qanotlari va qush ikki qanoti bo’lgandagina yuksaklarga parvoz etadi.


✍️✍️Abdullajon Niyozmatov

@essenamuna