Ilhomjon Ibragimov

Bu yildan boshlab ko‘proq madaniy hordiq olishga qaror qildim. Muzeylar, teatrlar, ko‘rgazmalar va turli tarixiy joylar hamda shaharlarga borish uchun vaqt ajratmoqchiman. Shuningdek, iloji boricha tashrif buyurgan joylarimdan video kontentlar tayyorlashga ham harakat qilaman.

Yilning ilk tashrifi sifatida Toshkent Malldagi Jadidlar ko‘rgazmasiga bordim. Ha, Jadidlar haqida biroz tasavvurga ega bo‘lgan inson uchun bunday ko‘rgazmaga borish qiziqarli bo‘lishi mumkin. Ammo shunchaki hech qanday ma’lumotga ega bo‘lmasdan borilsa, ko‘rgazmadagi chuqur ma’nolarni anglash qiyin bo‘lishi mumkin.

Ko‘rgazmaga borishdan oldin kutgan tasavvurim biroz boshqacha edi. Ammo borib ko‘rdimki, bu yerda biz bilgan mashhur Jadidchilar emas, balki bir yil oldin o‘qib, xulosamni yozgan "Qo‘rqma" asaridagi Olmoniyadagi talabalar haqida so‘z borar ekan. Ha, Rossiya eng ko‘p qo‘rqqan narsa — ota-bobolarimizning ilm olishga intilishi edi. Afsuski, aynan shu qo‘rquv sababli Olmoniyada tahsil olgan ko‘plab ziyolilarimiz qatag‘on qilindi. Deyarli butun ilmli avlod yo‘q qilindi, qizillar kelishidan oldingi erkin fikrli ziyolilarimizning tomiriga bolta urildi va ko’p yillik savodsiz qullikka mahkum etishdi.

Cho’lponning “Go’zal Turkiston” she’ri:

Go‘zal Turkiston, senga ne bo‘ldi?
Sahar vaqtida gullaring so‘ldi.

Chamanlar barbod, qushlar ham faryod,
Hammasi mahzun. Bo‘lmasmi dil shod?

Bilmam ne uchun qushlar uchmas bog‘chalaringda?

Birligimizning tebranmas tog‘i,
Umidimizning so‘nmas chirog‘i.

Birlash, ey xalqim, kelgandir chog‘i,
Bezansin endi Turkiston bog‘i.

Qo‘zg‘al, xalqim, yetar shuncha jabru jafolar!

Ol bayrog‘ingni, qalbing uyg‘onsin,
Qullik, asorat – barchasi yonsin.

Qur yangi davlat, yovlar o‘rtansin.
O‘sib Turkiston, qaddin ko‘tarsin,

Yayrab, yashnab o‘z Vataning gul bog‘laringda!

Ilhomjon Ibragimov

So‘nggi 1 oy davomida O‘zbekistonda FIFA tasarrufiga kiruvchi Futzal bo‘yicha jahon chempionati bo‘lib o‘tdi. Bu chempionatda Volontyor (Ko‘ngilli) sifatida qatnashish imkoniyatiga ega bo‘ldim. FIFA bu juda ham katta tashkilot va unda bo‘ladigan musobaqalarga anchadan beri qatnashishga harakat qilib yurar edim. Tabiiyki, bunga eng katta sabablardan biri futbol hayotimni ajralmas bir bo‘lagi bo‘lib ketgani ham sabab bo‘lgan.

Musobaqa davomida o‘zim kabi ko‘plab yoshlar va FIFA rasmiylari bilan ishlashga muvaffaq bo‘ldim. Bu nihoyatda katta tajriba bo‘ldi desam mubolag‘a bo‘lmas. Musobaqa o‘z nomi bilan Jahon chempionati deyilgani sababidan ko‘plab yurt vakillari, muxlislari bilan ko‘rishib, tanishish imkoniyatlariga ega bo‘ldim. Gapirsam gap ko‘p qisqaroq qilganda unutilmas lahzalarga boy bir oylikni o‘tkazdim!

Thank you FIFA!🏆

Ilhomjon Ibragimov

Olimpiadada shunchaki oltin medalni qo‘lga kiritish oson emas bo‘lib ham siz o‘zbek ayoli bo‘lsangiz. Bunday deyishimga albatta ko‘plab omillar bor jumladan qiz bolaning kelajagiga bo‘lgan ishonchning kamligi va eng og‘riqli nuqtamiz bu mentalitet.

Hozir olimpiadadan keyingi Diyora Keldiyorova bilan bo‘lgan podkastni eshitib bildimki uning bu g‘alabasi ortida juda ham ko‘p mehnat yotgan ekan. O‘sha kuni ta’kidlab o‘tganim — o‘ziga bo‘lgan ishonch va emotsiyaga berilmasligi ustida ham ishlaganini, bundan oldingi jahon chempionatida aynan hissiyotga berilib energiyasini yo‘qotib qo‘yganini aytib o‘tibdi.

Va eng muhim jihatlardan biri uning qat’iy intizomga amal qilishi ekan. Aytishi bo‘yicha, soat 22:00 gacha u uxlashga yotgan bo‘lishi kerak ekan va bu o‘z navbatida uning shug‘ullanish jarayonlarida yetarlicha kuch berishini bildiribdi. Haqiqatdan manam oxirgi vaqtlarda soat 22:00 gacha bo‘lgan vaqtda uxlashga yotaman va bu holat ba’zi odamlar uchun erish tuyuladi, qanaqasiga shunaqa erta uxlash mumkin deyishadi?

Bugungi kunda eng katta muammolardan biri bu uyqusizlik, qanchalik ko‘p biz telefon va ijtimoiy tarmoqlarga bog‘lanib qolganimiz sari bizda uxlash qiyinlashib bormoqda. Yetarlicha uyqu bo‘lmagandan keyin tabiiyki samaradorlik tushib ketadi. Ayniqsa jismoniy va aqliy mehnat egalari bu jihatni tezda farqlashadi.

Yaqinda Shaha Dolimovning podkastlaridan shu uxlash va odam o‘ziga bergan va’dasini ustidan chiqishining foydalari keyinchalik insonni ko‘plab yutuqlarga erishish kaliti bo‘lishi mumkinligini tushuntirib berganlarini ko’rdim. Odam aynan uxlashni tartibga solish orqali dastlabki o‘ziga bergan va’dalarni ustidan chiqishni boshlashi manimcha haqiqatga yaqinroq.

Kimga ham yoqadi ertalab soat 5 da turib ko‘chaga yugurishga chiqish? Lekin man sizlarga shuni aytsam nihoyatda ajoyib ekan. Muntazam shu ishni 1 haftadan beri bajarib tushundimki, odatda yon atrofga umuman ahamiyat bermay qo‘ygan ekanman, atrofda qanaqa jarayon kechyapti e’tiborsiz bo‘lib qolgan ekanman. Qushlar qanaqa sayrayapti, mahallalar o‘sha bolalik paytlarimdagidan qay darajada o‘zgaribdi, shularni ilg‘ashni boshladim. Va yana bir narsa, umuman ko‘zga bunday iltifot ko‘rsatgan paytda miyani ham rag‘batlantirish kerak ekan quloqchinlarsiz yugurib :)

Tongning sokinligi hali changlar ko‘tarilmagani, atrofda odamlarning deyarli yo‘qligi va yomg‘ir tomchilarining o‘ziga xosligini kechagi tongda ko‘proq his qildim.

Yana bir-ikki tajribalarni o‘z ustimda o‘tkazyapman ijobiy ta’sir qilsa albatta yozaman.

Ilhomjon Ibragimov