Otabek Jo'rayev

Birinchi navbatda, Husanov o‘zining profildagi pozitsiyasida chiqmaganini ta’kidlash lozim. U 4-3-3 sxemasida o‘ng qanot himoyasidan joy oldi, garchi u ilgari faqat markaziy himoyada o‘ynagan bo‘lsa ham (uchta markaziy himoyachi sxemasida eng markaziy va o‘ng/chap markaziy himoyachi sifatida).

Gvardiolaning bunday qadamini ko‘proq himoyaviy sxema tanlovi sifatida ko‘rish mumkin. Odatda, Man Sitining o‘ng qanot himoyasida hujum salohiyati yuqoriroq bo‘lgan Mateush Nunesh yoki Riko Lyuis o‘ynaydi. Lyuis esa hujum paytida ko‘pincha tayanch zonaga o‘tib ketadi va 4-3-3 sxemasi 3-2-2-3 ga aylanadi. Shuningdek, Husanov maydonga Vinisiusga qarshi tushgan bo‘lishi mumkin.

Umuman olganda, Husanov Vinisiusni neytrallashtirish vazifasini uddaladi. Braziliyalik futbolchi o‘yin davomida uchta zarba berdi (faqat bittasi aniq), ikkita uzatma amalga oshirdi (ularning hech biri manzilgacha yetib bormadi) va yettita dribling urinishidan faqat uchtasi (43%) muvaffaqiyatli bo‘ldi. Ha, Vinisius jarima maydoniga kirishda Husanovni bir necha bor aylantirdi, biroq gollar boshqa zonalardan urildi. Real safida nafaqat Vinisius, balki Mbappe va Rodrigo ham maydonga tushdi. Aynan ular, aslida, ushbu o‘yin natijasini yaratishdi. Shaharliklar o‘tkazib yuborgan uchta goldan faqat bittasida (ikkinchisida) Husanovning aybi bor.

Abduqodirning Real bilan o‘yindagi statistik ko‘rsatkichlariga nazar tashlaymiz (Wyscout ma’lumotlari):
• 80 ta texnik-taktik harakat (67 ta muvaffaqiyatli, 84%);
• 1 ta zarba (1 ta aniq zarba, 100%);
• 59 uzatmadan 54 tasi aniq (92%);
• 2 ta tepadan uzatma (1 ta aniq, 50%);
• 2 ta dribling harakati (1 ta muvaffaqiyatli, 50%);
• to‘p uchun 17 ta yakkakurash (11 ta g‘alaba, 67%);
• 1 ta havoda yakkama-yakka kurash (1 ta muvaffaqiyatli, 100%);
• 3 ta perexvat;
• 11 marta to‘pni qaytarish (to‘pni olib qo‘yish va podbor);
• 3 marta jarima maydonidan to‘pni tepib yuborish.

SofaScore statistik portali Husanovning o‘yinini 6,8 ballga baholagan. Bu Natan Ake, Yoshko Gvardiola, Omar Marmush va Savinoga qaraganda yuqoriroq.

Bu Husanovning Manchester Siti safidagi (ayniqsa, Yevropa Chempionlar Ligasi pley-off bosqichida Realga qarshi) to‘rtinchi o‘yini bo‘lganini hisobga olsak, uning o‘yinini juda muvaffaqiyatli deb atash mumkin.