Farxod Zayniyev

Энергетика вазирлиги томонидан совуқ кунлар кириб келиши муносабати билан газ заправкалари фаолиятига қисқа муддатли чекловлар киритилди.

Албатта, чекловлар ижтимоий соҳа объектлари ва аҳоли хонадонларини табиий газ ва электр энергияси билан таъминлаш устувор вазифа экани билан боғлиқ. Бироқ, бу ҳар қишда такрорланадиган одатий ҳолга айланмаслиги керак.

Ҳозирча, тан олишимиз керак, имкониятларимиздан келиб чиқсак, бундан бошқа иложимиз ҳам йўқ.

Яқинда ишга туширилган “Avto24” мобил иловаси ҳайдовчиларга яқин-орадаги газ заправкалар ҳақида зарур маълумотларни тақдим этиб бориши, маълум маънода қулайлик туғдириши керак, эди.

Аслида-чи? Газ заправкаларда соатлаб навбат кутган юртдошларимизга қанчалик нафи тегди экан?

Шахсан ўзим иловадан фойдаландим, таассуротлар кутилганидек эмас. Заправкалар ишламоқдами ёки йўқ, ундаги навбатлар ҳолати қандайлиги ҳақидаги саволларга эскирган маълумотлар билан жавоб олиш мумкин.

Олдинда бизни яна совуқ кунлар кутиб турибди. Бу борада тавсиям шуки, ушбу илова билан бир вақтнинг ўзида, маҳаллий ҳокимликларнинг ижтимоий тарқмоларидаги расмий саҳифаларида ҳам чеклов киритилаётган газ тўлдириш шохобчалари рўйхати ва аниқ вақтини эълон қилиб бориш бўйича қатъий чораларни кўриш керак.

Бунда, маълумотларни мунтазам янгилаб бориш ҳам лозим бўлади.

Яна бир масала. Гоҳида газ заправкаси расман ёпиқ бўлса ҳам, орқа тарафида нимадирлар амалга оширилаётганига кўзимиз тушиб қолади. Шундай номақбул хатти-ҳаракатларнинг олдини олиш учун шохобчаларда ўрнатилган чекловлар устидан ваколатли идораларни бу борада қатъий назорат ўрнатишга чақириб қоламиз.

👉 @deputat_f_zayniyev

Йўл ҳаракати хавфсизлиги ва ҳаракат қоидаларини бузганларга нисбатан жазо чораларини кучайтириш муҳим масала эканлигини тан оламиз.

Бироқ, жазо қонуннинг асосий мақсади эмас. Жазони жорий қилишдан олдин, ҳаракат иштирокчилари учун барча зарур шароитларни яратиш керак.

Масалан, пиёдалар учун хавфсиз ўтиш жойлари, ҳайдовчилар учун аниқ ва қулай йўл инфратузилмаси, жамоат транспорти йўналишларининг тўлиқлиги ва самарадорлиги, булар асосий вазифалар бўлиши керак.

Айтиш керакки, юртимизда жамоат транспортини ривожлантиришга жиддий эътибор қаратилаётгани, бу нафақат экологик жиҳатдан самарали, балки ҳаракат хавфсизлигига ҳам ижобий таъсир кўрсатмоқда.

Шу билан бирга, жамоат транспорти йўловчилари учун қулай ва хавфсиз шароитлар яратилмасдан, улардан интизом ва қоидаларга риоя қилишни талаб қилиш адолатсизлик бўлади.

Шунингдек, биз қонунларга ўзгартиш киритганда, чет эл тажрибасига кўр-кўрона таянишни эмас, балки ўзимиздаги инфратузилманинг ҳақиқий ҳолатини инобатга олишимиз лозим.

Қатор ривожланган мамлакатларда транспорт инфратузилмаси йўл ҳаракати қоидаларига риоя қилиш учун барча шарт-шароитларни яратган.

Биз эса авваламбор, йўллар, пиёдалар ўтиш жойлари ва жамоат транспорти тизимини яхшилаш устида ишлашимиз керак. Шунингдек, ҳаракат қоидаларига риоя қилишнинг ижтимоий тарғиботини кучайтириш зарур.

Жазо адолатли бўлиши керак, аммо унга фақат сўнгги чора сифатида мурожаат қилишимиз зарур.

Чунки ҳақиқий мақсад — ҳаракат хавфсизлигини таъминлаш, жазо эмас, балки риоя қилиш шароитини яратиш орқали барча фуқаролар учун тенг ва хавфсиз муҳит яратишдан иборатдир.

👉 @deputat_f_zayniyev

Prezidentimiz tomonidan ilgari surilgan tashabbuslar va fikrlar saylovdan keyingi yangi parlament tarkibi oldidagi ulkan mas’uliyatni yanada chuqurroq anglashga undaydi.

Yangilangan Konstitutsiya asosida parlament tarkibining shakllanishi, aralash saylov tizimining joriy etilishi, yoshlar, ayollar va nogironligi bo‘lgan shaxslarning deputat boʻlib saylanishi parlamentimizda haqiqiy demokratik vakillikni ta’minlashga zamin yaratdi.

Prezidentimiz ta’kidlaganidek, qonun ijodkorligi xalqning manfaatlariga, dolzarb muammolarni hal qilishga qaratilgan bo‘lishi lozim.

Bunda ijtimoiy himoya, tadbirkorlik muhitini yaxshilash, ekologiya, raqamli texnologiyalar va boshqa muhim yo‘nalishlar bo‘yicha ilgari surilgan tashabbuslar hal qiluvchi ahamiyatga ega bo‘ladi.

Parlament nazoratining kuchaytirilishi va deputatlarning mahalliy darajadagi faolligi ham ushbu maqsadlarga erishishda muhim qadamdir.

Deputat sifatida bizning asosiy vazifamiz – xalqning ishonchini oqlash, dolzarb muammolarni qonuniy yechimlar bilan hal qilish va mamlakatimiz rivoji uchun zarur bo‘lgan qonunchilik asoslarini yaratishdir.

Prezidentimiz belgilab bergan yo‘nalishlar bizni yanada samarali ishlashga, provardida O‘zbekistonni yanada farovon va taraqqiy etgan davlatga aylantirishga xizmat qiladi.

👉 @deputat_f_zayniyev

Oliy Majlis Qonunchilik palatasi deputatligiga munosib deb topib, menga bildirilgan ishonch uchun saylov okrugimdagi saylovchilarimga samimiy minnatdorchiligimni bildiraman.

Har biringizning ovozingiz va ishonchingiz men uchun juda qadrli va ahamiyatli bo‘lishi bilan birga, xalqimiz va yurtimiz ravnaqiga xizmat qilish mas’uliyatini ham anglatadi.

Sizlarning yuksak ishonchingizni oqlash va parlamentda xalqchil qonunlarni qabul qilishda barcha kuch va imkoniyatlarimni ishga solaman.

Birgalikda yorqin kelajak sari olg‘a intilamiz!

👉 @deputat_f_zayniyev