Madaniyat va san’atni rivojlantirish jamg‘armasi delegatsiyasining Bahraynga tashrifi chog‘ida Shayx Ibrohim bin Muhammad Ol Xalifa nomidagi Madaniyat va tadqiqotlar markazida jadidchilik harakatining O‘zbekiston madaniyati va ta’limidagi o‘rni mavzusida sho‘ba muhokamasi bo‘lib o‘tdi. Tadbir shayx May bint Muhammad Ol Xalifa xonimning taklifiga binoan o‘tkazildi.

Munozarada d-r. Bahrom Irzayev va Bobur Sayomov ishtirok etdilar. Ular jadidlarning madrasalar islohoti, xotin-qizlar ta’limini rivojlantirish va milliy o‘zlikni anglashni mustahkamlashga qo‘shgan hissalari xususida so‘zlab berdilar. Shuningdek, tadbir ishtirokchilariga O‘zbekistonda ularning merosini asrab-avaylashga qaratilgan tashabbuslar, shu jumladan, multimedia ko‘rgazmasi va boshqa madaniy loyihalar haqida ma’lumot berildi.

Bahs-munozara jadid ma’rifatparvarlari merosi va ularning zamonaviy jamiyatga ta’sirini muhokama qilish uchun muhim maydonga aylandi.