Endi menga desa qulasin osmon,
Daryolar ortiga oqsin, ishim yo‘q!
Endi men jonimga joylagan inson,
Hammadan azizroq bilgan kishim yo‘q!

Endi menga desa tugasin umr,
Kim bor yana mendan alam olmadi?
Shamol, kel, istasang ko‘ksimni yemir,
Yurak deb atalar yerim qolmadi!

Ohlarim jim bo‘ling, chiqarmang ovoz,
Meni tushunmaydi baribir hech kim,
Bor-yo‘g‘i birovni sevardim holos,
Bir necha kun oldin undan voz kechdim!

Endi menga desa ustimdan kuling,
Agar g‘iring desam odammasman men.
Gapiring, jim turmang, dadilroq bo‘ling,
Kimga ishondingu, endi kimsan deng!

Faqat bitta narsa qiladi alam,
Faqat bir narsaga chidab bo‘lmadi.
Bitta nomardni deb, istamasam ham,
Odam degan zotga ishonch qolmadi!

Endi menga desa...

Muallif: Malika Tavfiq

♻️Яқинларга хам юборамиз

✿•┈┈┈┈┈••ৡ❀ৡ•┈┈┈┈┈•✿

https://t.me/Soz_qalb_kozgusi