Shumanay tumani hokimligi binosi oldidagi maydonda, bayramona bezatilgan yorqin archa atrofida Prezident archasi bayram konserti boʻlib oʻtdi.

Tuman aholisining koʻnglini koʻtarish va yangi yil bayramini tantanali nishonlash maqsadida tashkil etilgan ushbu tadbirga Shumanay tumani hokimi A.Ametov, Oʻzbekiston Respublikasi Prezidentining Shumanay tumanidagi xalq qabulxonasining rahbari I.Abdraxmanov, sektor rahbarlari, deputatlar, mahalla faollari va keng jamoatchilik, albatta, eng asosiysi, quvonchli bolajonlar qatnashdi.

Bayram tadbiri tuman hokimi A.Ametovning samimiy tabriklari bilan boshlandi. U oʻz nutqida tuman aholisini yangi yil bilan tabriklab, oʻtgan yilning yutuqlari va kelgusi yil uchun rejalar haqida gapirib oʻtdi. 

Shundan soʻng, bayram konsert dasturi boshlandi. Tuman Madaniyat uyi xonandalari  tomonidan ijro etilgan musiqa va raqslari tomoshabinlarga katta zavq bagʻishladi. Bolalar uchun maxsus tayyorlangan animatsion dastur va oʻyinlar ham katta qiziqish uygʻotdi.

Bayramning eng kulgili va hayajonli qismi esa Qorbobo va Qorqizning kelishi bilan boshlandi. Ular bolalar bilan oʻyinlar oʻynadi, qoʻshiqlar kuyladi va har bir bolaga bayram sovgʻalarini taqdim etdi. 

Bayram juda koʻtarinki ruhda oʻtdi.  Bolajonlarning quvonchi, kattalarning samimiy tabriklari va bayramona muhit hamma uchun unutilmas taassurot qoldirdi.