Deputat máseleni ornında úyrendi

2023-jıl 11-fevral kúni Xojeli rayonı, 40-sanlı "Aybek" saylaw okruginen Qaraqalpaqstan Respublikası Joqarǵı Keńesi deputatı Tajibay Romanov "Samankol" APJ aymaǵındaǵı "Qamısshalı" awılı puqaralarınıń múrájáti boyınsha QR Transport ministrligi, Ishki isler ministrliginiń Jol háreketi qáwipsizligi basqarması hám rayon hákimliginiń xızmetkerleri menen birgelikte másele ornına barıp úyreniw jumısların alıp bardı.

Múrájátte bildiriliwinshe, aymaq xalqı ushın rayon orayınan awılǵa shekem marshrutlı taksi qatnawınıń jolǵa qoyılıwına úlken zárúrlik bar. Tiyisli taraw xızmetkerleri marshrut jollarınıń jaramlılıǵın, aymaqtaǵı 2 kópirdiń qáwipsizligin kórip shıǵıp, talapqa juwap berse, transport ministrlik tárepinen sxema tiykarında marshrutlı taksi qatnawına ruxsat beriletuǵınlıǵın puqaralarǵa túsindirip ótti. Múrájáttiń orınlanıwı deputat tárepinen qadaǵalawǵa alındı.
Kanalǵa aǵza bolıw:https://t.me/Milliy_tiklanish_QR