Меҳрубоне дар ҷаҳон дорам, ки номаш Модар аст,
Қаҳрамоне дар ҷаҳон дорам, ки номаш Модар аст.
Аввалин рафтору гуфторам бувад аз дарси ӯ,
Нуктадоне дар ҷаҳон дорам, ки номаш Модар аст.
Ҳазрати Лоиқ ба васфаш ёдгор эҷод кард,
Ҷовидоне дар ҷаҳон дорам, ки номаш Модар аст.
Ин назокат, ин латофат, ин муҳаббат, ин вафо,
Аз ҳамоне дар ҷаҳон дорам, ки номаш Модар аст.
Роздони қалби ман, роҳатрасони қалби ман,
Қадрдоне дар ҷаҳон дорам, ки номаш Модар аст.
Дар ҷаҳони неку бад, дар ин ҷаҳони хайру шар,
Ман ҷаҳоне дар ҷаҳон дорам, ки номаш Модар аст.
Аз сабуриҳои Модар мефазояд ҳайратам,
Сахтҷоне дар ҷаҳон дорам, ки номаш Модар аст.
Сад ҳазорон нукта дар васфаш агар гӯям кам аст,
Достоне дар ҷаҳон дорам, ки номаш Модар аст!

          ┄┅অঠই✯❀✯ইঠঅ┅┄

http://T.ME/BO_ZABONI_TOJIKI_MEOMUZEM