Jamshidbek Islom Karimov nomidagi davlat stipendiyasi sohibi
Oliy ta’lim, fan va innovatsiyalar vazirligining joriy yil 11-dekabrdagi 464-son buyrugʻi bilan 2024/2025 o‘quv yili uchun prezident va nomli davlat stipendiyalari oliy ta’lim muassasalari bakalavriat bosqichining talabalari roʻyxati eʼlon qilindi.
Buyruq bilan Transport va logistika fakulteti, Transport logistikasi yo‘nalishi 4-bosqich talabasi Solimuhammadov Jamshidbek Sohibjon o‘g‘li Islom Karimov nomidagi davlat stipendiyasi sohibi bo‘ldi.
Jamshidbek 2003-yilda Farg‘ona viloyatining Rishton tumani tug‘ilgan. 2021-yilda Andijon mashinasozlik instituti Transport va logistika fakultetining Transport logistikasi ta’lim yo‘nalishiga davlat granti asosida o‘qishga qabul qilingan.
Jamshidbek o‘qishi davomida namunali xulqi, odob-axloqi, tashkilotchiligi va bilim-zakovati bilan tengdoshlari orasida munosib hurmatga sazovor bo‘lib kelmoqda.
U bugungi kunga qadar nafaqat institutda, balki viloyat, Respublika hamda xalqaro miqyosida o‘tkazilayotgan ma’naviy-ma’rifiy tadbirlar, ilmiy-amaliy anjumanlarda faol ishtirok etib kelmoqda. Turli tanlovlar, jumladan, Andijon mashinasozlik institutida 2021-2022 o‘quv yilida Oliy matematika fanidan o‘tkazilgan olimpiada hamda “Yilning eng faol talabasi 2024” ko‘rik-tanlovi “Yilning o‘z mutaxassisligi bo‘yicha eng bilimdon talabasi” nominatsiyasi g‘olibi.
Institut rektori hamda atoqli olim, professor I.Ermatov nomidagi stipendiya sohibi.
Hozirda O‘zbekiston yoshlar ittifoqining Andijon mashinasozlik instituti boshlang‘ich tashkiloti Harbiy vatanparvarlik loyihalar koordinatori, shuningdek, Yoshlar akademiyasining Avtomobilsozlik va transport fakulteti lideri hisoblanadi.
Jamshidbek tashabbusi bilan institutda “Tadbirkor yoshlar” klubi tashkil etilib, yoshlarda tadbirkorlik ko‘nikmalarini shakllantirish yuzasidan turli seminar va treninglar o‘tkazib kelinmoqda.
Jamshidbek Solimuhammedov “Logistika kompaniyasining transport va texnologik sxemasini tanlovchi dasturiy mahsulot” nomli dasturini ishlab chiqib, uni davlat ro‘yxatidan o‘tkazgan.
Jamshidbekni ushbu muvaffaqiyat bilan institut jamoasi va talabalari nomidan tabriklab, kelgusidagi o‘qish va ishlariga omad va zafarlar tilab qolamiz!
