КАТТАҚЎРҒОНЛИК ФЕРМЕР ТАЛОН-ТОРОЖДАН ШИКОЯТ ҚИЛМОҚДА, ПРОКУРАТУРА ЭСА ЖИМ

Каттақўрғон туманидаги фермер хўжалиги вакиллари ўз мулки талон-торож қилингани, аммо ҳуқуқ-тартибот идоралари бу ишга кўз юмаётганидан шикоят қилмоқда.

Элтуз таҳририятига мурожаат қилган "Ғаниев Абдиманон Абдурасулович" фермер хўжалиги вакилларининг айтишича, 375 млн сўмлик техника воситалари йўқ қилинган, 450 млн сўмлик томчилаб суғориш тизими эса бузиб ташланган.

Фермерлар 2024 йил декабридан бери прокуратурага мурожаат қилиб келаётганини, аммо "жиноят яширилаётгани"ни иддао қилмоқда.

Уларга кўра, жиноят аниқ бўлишига қарамай, прокурорлик ҳужжатларни орқа сана билан туман ИИБга юбориб, ишни суринкали тарзда кўриб чиқмоқда.

15 январь куни вилоят ИИБ раҳбари сайёр қабулида ҳам фермерлар ариза топширган, аммо уларнинг айтишича, ариза жимгина ёпилган.

Фермерлар вилоят прокурори бу ишни шахсан назоратга олиши ва жиноий иш очилиши учун чора кўришини талаб қилмоқда.
Элтуз таҳририяти мазкур ҳолат юзасидан прокуратура ва вилоят ИИБсига минбар беришга тайёр.

💬Telegram |📱Facebook |
🐦Twitter |📱Instagram | ▶️YouTube