#hayotiy
Turkiyada hayot qanday?Shu yerda yashayotgan va o'qiyotgan biri sifatida bu savolga javob bermoqchiman.
Hamma joyning o'z tosh-tarozisi bor. O'ziga xosliklari va "lekin"lari ham bor. Bugun ko'rgan-kechirganlarim asosida bu yerda yashashning ijobiy tomonlarini sanab o'taman.
✅
Yuqori turmush sifati (quality of life). Turkiya siyosat, matbuot erkinligi, ayollar, bolalar va inson huquqlari, sifatli tibbiyot, sifatli ta'lim va ekologiya borasida o'ziga maftun qila oladi.
✅
Yashash qulay (Toshkentdan arzon)
Turkiyada o'qish uchun to'lovlar va yashash narxlari ancha arzon. Turkiya transport xarajatlari, muzey, kinoteatrlar va boshqa ko'plab tadbirlarda talabalarning hayotini yengillashtirish uchun chegirmalar taqdim etadi.
✅
Jamoat transporti. Menimcha, Turkiya jamoat transporti qulayligi borasida dunyoda eng yaxshi davlatlardan bo'lsa kerak. Shaxsiy ulovga zarurat sezmaysiz. Metro, avtobus, minibuslar soat millaridek ishlaydi. Kechikishlar deyarli yo'q. Toza, qulay tezyurar poyezdlarda butun mamlakatni kezish mumkin.
✅
Ta'lim. Turkiyada o'qishning eng omadli yo'li bu "Turkiya Burslari" orqali o'qish. Bu grantda deyarli barcha xarajatlar davlat tarafidan qoplanadi. Til kursida o'qib, turk tilini o'rganish imkoni ham beriladi.
Davlatda 200 dan oshiq universitet bor. Bitta oliygohda 60–80 mingdan ortiq talaba tahsil oladi. Ya'ni xorijlik talabalarni qabul qilish imkoniyati juda yuqori. Shu boisdan ham har yili dunyoning turli burchaklaridan minglab yoshlar kelib bu yerda tahsil oladi. O'quv dargohlari xalqaro talablarga to'laqonli javob bera oladi. Talabalar uchun universitetda to'siq va cheklovlar yo'q. Yotoqxona masalasi muammo emas. Siz xususiy va davlat yotoqxonalarida yashashingiz mumkin, bu sizning tanlovingiz.
✅
Ingliz tili. Aksariyat yoshlar ingliz tilida gapira oladi. Universitetda o'qish uchun faqat turk tilini bilish kerak degan qoida ham yo'q. Ingliz yoki turk tilida o'qishni o'zingiz hal qilasiz. Turk universitetlari ko'plab yo'nalishlar ingliz tilida o'qitilmoqda, ayniqsa muhandislik, xalqaro munosabatlar va biznes.
✅
Erk va e'tiqod. Turkiyada sizning kim ekaningiz, kiyinish madaniyatingiz, irq, rangingiz qandayligi, e'tiqod, diningiz nima ekanligi ahamiyatsiz. Aytganimdek, xorijlik talabalar juda ko'p. Va ularni o'qitish hazil gap emas. Har bir talabaning erki va e'tiqodini hurmat qilgan holda ta'lim berish, munosabatda bo'lish ularning eng katta yutug'i.
✅
Ko'p millatli maskan. Turkiyada muhojirlar ko'p. Yevropa, Afrika davlatlari fuqarolari, Turkiy xalqlarning hammasi bor. Turkiya tom ma'noda Sharq va G'arb o'rtasidagi ko'prikdir.
✅
Do'stona munosabat. Turklar samimiy va mehmondo'stligi bilan tanilgan. Siz bemalol ular bilan tanishishingiz, choy ichishingiz va mahalliy odamlar bilan suhbatlashishingiz mumkin. Qardosh xalq bo'lganimiz uchun hayot tarzimizda deyarli farq yo‘q.
✅
Turfa xil taomlar. Ko'p millatli davlatda mazali ovqat topish muammo bo'lmaydi, chunki oshxonalar ham xilma-xil. Turk, hind, uyg'ur, koreys taomlari... O'zbek tamaddixonalari ham talaygina.
✅
Iqlim. Turkiyada yashashning menga yoqqan jihatlaridan biri bu shaksiz iqlimdir. Yashillik juda ko'p. O'rmonlarga borib, o'pkangizni to'ldirib kislorod yuta olasiz. Doim hayotni sevish uchun optimal ob-havo bo'ladi.
✅
Sayohat. Turkiya haqida gapirilganda odamning xayoliga birinchi Istanbul, Antalya, Izmir, Bursa keladi. Lekin shuni unutmangki, Istanbul – bu haqiqiy Turkiya emas. Agar mamlakatning asl madaniyatini, yashash tarzini ko'rmoqchi bo'lsangiz, kichik shaharlarini kezishni tavsiya qilaman. Mamlakat ichida sayohat qilish zavqli: istasangiz qadimiy shaharlarda tarixiy obidalar, me'morchilik asarlaridan bahra olasiz, istasangiz dengiz bo'yida sayr qilasiz. Turkiya tabiati juda-juda-juda go'zal. Barchasi qo'l uzatgulik masofada...
@Ochopat_book
