MARGʻILONDA

Margʻilonda kezar edim... Behosdan
Seskanib ketdim bir tanish ovozdan. "Oʻtkan kunlar” boʻlgan ekan-da rostdan,
Otabekni titratgan soʻz oʻshamu -
"Siz oʻshamu?" degan qiz siz oʻshamu???

Sochingiz ham oʻsha... Shabboda oʻynar,
Zulfingiz parishon, nenidir oʻylar! Koʻzingiz ham tanish, bir savol qiynar:
Otabekni titratgan koʻz oʻshamu,
"Siz oʻshamu?" degan qiz siz oʻshamu???

Dil uyim keng Toshkan sari kelsangiz,
Sizdan soʻng Zaynabga joy yoʻq, bilsangiz!
"Buyogʻiga Zaynab ursin!" desangiz, Ikkalasin uzatgan yuz oʻshamu,
"Siz oʻshamu?" degan qiz siz oʻshamu???

Har bir xato solib turar yodima, Sevgimiz topmagay undoq xotima. Qoyilmisiz, sizni tanib qoldim, a? Oʻtmishlarni oʻrtagan his oʻshamu, "Siz oʻshamu?" degan qiz siz oʻshamu???

Siz menga juda ham tanish, tanishsiz,
Ne sababdan, ayting buncha xomushsiz?
Tan oling-da, axir oʻsha Kumushsiz, Bizga boqing, siz kutgan biz - oʻshamu,
"Siz oʻshamu?" degan qiz siz oʻshamu???

Indamaysiz, dilim faryoda toʻldi,
Yuragim matosi sabota toʻldi.
Goʻshanga ichida aytsangiz boʻldi- Otabekka tanish oʻsha goʻshamu, "Siz oʻshamu?" degan qiz siz oʻshamu???

Xayrulla Hamidov