Kuzga maktub
Uzatdilar bahorni yozga,
Ammo bahor sevardi kuzni.
Yosh tanlamas ekan muhabbat,
Kuz ham jondan sevardi qizni.
Bir umrga kuydirib o’tdi,
Gul-bahorni g’amga qo’yib yoz.
U yoqda-chi kuzni tergarlar,
Muhabbatdan ochma deb ovoz.
Essiz, essiz umr,
Essiz umr o’tdi hijronda.
Muhabbatga tekkanmi qarg’ish,
Bahor yig’lar yoz-saratonda,
Kuzni esa quchar sovuq qish.
Musiqadan
***
Nihoyat, sen manzilingga yetib kelding. Shamollaring hislarni uygʻotib yubordi. Koʻz yoshlaring ham insonlarni, ham ona zaminni larzaga keltirdi. Sap-sariq yaproqlar yerda quyosh misol tovlanadi. Aslini olganda, sen bu yerni hech qachon tark etmaganding. Bilasanmi, nega? Negaki, sen insonlar qalbida yashayapsan. Yomgʻir boʻlib, ularga taskin beryapsan, yoki azob... Sen eslatuvchisan. Oʻtmishdagi xotiralarni tonggi sabo bilan yodga solasan. Kimdir oʻz orzusiga sen bilan yetishdi, kimdir esa yoʻq. Shuningdek men ham...
Men faqat senga erishishni xohlagandim. Odamlarda shunday xislat bor: biror bir narsaga erisha olmasliklarini bilsalar ham oʻsha narsa tomon harakat qilishadi. Men ham xuddi shunday qildim. Ammo butun dunyo, butun tabiat bunga qarshi chiqdi. Eslaysanmi, sen ham mendek eding: gullab yashnarding, baxtiyor eding. Oʻsha ayriliqdan soʻng sen xazon boʻlding... Men sabab... Va bu narsa abadiy mahkumlik edi...
Bu hajr savdosi menga juda ko‘p ta'sir qildi. Axir, qanday qilib ham ta'sir qilmasligi mumkin? Sen butun umr davomida intiq kutganing oxirida boshqa bilan bo‘lsa... Bundan yomonroq azob yo‘q, bo‘lmasa ham kerak.
O‘tmishdagi voqealarda o‘zingni aybdor qilma. Aslo unday emas! Har doim yomonlar kasriga yaxshilar qoladi. Meni deb sen jabr chekding. O‘sha voqea bir o‘t ediki, mening aybim tufayli yaproqlaringni sap-sariqqa bo‘yadi. Va seni bu olovdan faqatgina sovuqlik sohibasi qutqara olardi...
Muhabbat juda go‘zal ekan. Men dardimni osmonga aytaman. Osmon esa og‘riqli hislarni tuygancha ko‘z yosh qiladi. Va yer ustidan nafis gullar o‘sib chiqadi... Ko‘ryapsanmi, sening sevging bilan tirikman... Ba'zan sabo orqali suhbat qurgim keladi. Ammo befoyda...
Sening-la bo‘lish imkonsiz bo‘lsa-da, umid qilishdan to‘xtamayman... Butun umr bo‘lsa, butun umr...
Bu yerlarga sen kelganingda, go‘zal gullarga ko‘zing tushsa, bilginki, men yashayapman.
Siniq xotiralarni eslatganim uchun meni maʼzur tutgaysan.
Seni hech qachon unutmaydigan BAHOR...
