Qonunchilik palatasi spikeri Nurdinjon Ismoilov yoʻl harakati xavfsizligiga oid qonun loyihasini muhokama qilishda bildirgan fikrlari turlicha talqin qilindi. Biroq, spikerning fikrlariga yaxshilab eʼtibor qilsangiz, uning sof yuridik nuqtai nazardan toʻgʻri talablar qoʻyganligini koʻrish mumkin.

Spiker loyiha tashabbuskorlariga Maʼmuriy javobgarlik toʻgʻrisidagi kodeks konstruksiyasini eslatib, bitta huquqbuzarlik uchun ikkita javobgarlik belgilamaslik zarurligini va shu nuqtai nazardan ikkinchi oʻqishda qonun loyihasini qayta ishlash lozimligini aytyapti. Bu fikrlar uning jamoat transportiga qarshi ekanligini anglatmaydi.

Spikerning talablari, avvalo, qonun loyihasini aniq va huquqiy jihatdan mukammal boʻlishiga qaratilgan. Uning yondashuvi amaliyotda ortiqcha qarama-qarshiliklar yoki huquqiy noaniqliklarning oldini olishga qaratilgani bilan ahamiyatli. Bunday yondashuv qonun ijodkorligining sifati va xalq manfaatlariga muvofiqligini taʼminlashning muhim qismi hisoblanadi.