Bugungi siyosatning bosh maqsadi – odamlarni rozi qilish. Ayni mana shu mezon har qaysi sohada islohotlarning borishiga, natijadorligiga bevosita ta’sir ko‘rsatadi. Ya’ni, aholi bilan yuzma-yuz muloqot qilish, murojaatlarini tinglash orqali ularni qiynayotgan muammolarga nafaqat yechim topish, balki mavjud kamchiliklarni aniqlab, zarur choralar ko‘rishga ham katta turtki beradi. Qolaversa, bunday ochiq va shaffof tizim yangi tashabbuslarga keng yo‘l ochadi.

Shu bois biz Madaniyat vazirligi tizimida odamlarga ko‘proq quloq tutish, ularning to‘g‘ridan-to‘g‘ri mas’ul rahbarlarga murojaat qilishi uchun yanada keng imkoniyatlar, qulayliklar yaratishga intilyapmiz. Xususan, yaqinda “Onlayn qabul” tashkil qildik. Unda shaxsan o‘zim, vazirlik markaziy apparati boshqarma va bo‘lim boshliqlari, hududiy madaniyat organlari rahbarlari ishtirok etdi.

E’tiborlisi, ushbu qabulni o‘tkazishimiz haqida e’lon berganimizda juda ko‘plab murojaatlar kelib tushdi. Bunday faollik, ochig‘i, bizni quvontirdi. Bir qancha yurtdoshlarimiz bilan ekran orqali, masofaviy shaklda suhbatlashdim, qiynayotgan muammolarini tingladim. Ularni hal etish bo‘yicha tegishli mas’ullarga joyida topshiriqlar berdim.

Biz bunday “Onlayn qabul”larni joriy yil davomida muntazam o‘tkazamiz. Modomiki, bizning vazifamiz xalqimizga xizmat qilish ekan, vazirlik faoliyatiga taalluqli har qanday murojaatni eshitishga tayyormiz va albatta, ularga yechim topish yo‘lida bor bilim, kuch va salohiyatimizni ishga solamiz.

🚀 Telegram / 📷 Instagram