Шаҳарда юрибди отанг ризқ териб,
Меҳри музларга ҳам меҳрини бериб,
Сен-чи юролмайсан кўксингни кериб,
Олисдаги болам, омон бўл, соғ бўл.

Тунлар танг қилади соғинч хумори,
Виртвал висол бўлмас соғинчга дори,
Бу менинг аҳдиммас, қисмат қарори,
Олисдаги болам, омон бўл, соғ бўл.

Сиртим силлиқ аммо юрагим яра,
Қузғунлар чўқиган кўксимга қара,
Ёмонлар ичида бир ман бечара...
Олисдаги болам, омон бўл, соғ бўл.

Замон қандай бўлса шундай замонман,
Уйга бир ойда бир келган меҳмонман,
Ўзбектош деган бир шоир забонман,
Олисдаги болам, омон бўл, соғ бўл. *** https://t.me/uzbektoshijodi