Sotsiologik tasavvurni rivojlantirish faqat sotsiologiyaning emas, antropologiya (ana'naviy jamiyatlarni oʻrganish) va tarix materiallaridan foydalanishni ham taqazo qiladi. Sotsiologik tasavvurning rivojlanishi uchun antropologik yoʻnalish juda muhim ahamiyatga ega, chunki u turli-tuman ijtimoiy hayotning kaleydoskopini (ichida turli naqshlar koʻrinadigan durbin, bu yerda majoziy maʼnoda) koʻrish imkonini beradi.

Ularni oʻz hayotimiz bilan solishtirar ekanmiz, xulqimizning oʻziga xos noyob xususiyatlari toʻgʻrisida koʻproq narsa bilib olamiz. Sotsiologik tasavvurni rivojlantirishda tarixiy yoʻnalish ham shunday fundamental ahamiyatga ega: biz oʻzimiz yashayotgan hozirgi dunyoning oʻziga xos mohiyatini oʻtmish bilan qiyoslaganimizdagina bila olamiz. Oʻtmish shunday koʻzguki, sotsiolog unga qarab bugunni tushuna oladi.

Bu holatlarning har birida ularni yaxshiroq tushunish uchun kundalik rasm-rusumlarimizdan "chetga chiqishimiz" nazarda tutiladi.

Shunday boʻlsa ham, Mills sotsiologik tasavvurning boshqa jihati - bizning kelajakdagi imkoniyatlarimizga urgʻu bergan edi.

Sotsiologiya bizga ijtimoiy turmush tiplarini tahlil qilishdagina yordam berib qolmay, ochilayotgan kelajakka nazar tashlash imkonini ham beradi. Sotsiologik fikrning erkin harakati faqat yuz berayotgan hodisalarning emas, biz muayyan tarzda harakat qilsak, yuz berishi mumkin boʻlgan hodisalarning ham mohiyatini anglash imkonini yaratadi.

Kelajakka biror taʼsir oʻtkazish boʻyicha harakatlarimiz, agar ular mavjud tamoyillarni sotsiologik tushunishga asoslanmasa, samarasiz boʻlib qoladi.

Kanalga ulanish:👉🏼 @sotsiologiyaa