Shaxsiylik | bintu Malik 🍀

#shaxsiy_fikr

Nimaga oxirgi paytlar ustozlikdan ko'p gap ochyapman. Sababi, o'zim dars berishni boshladim va kunlik duch keladigan muammolar g'ashimga tegyapti.

Avval ham dars berardim, oflayn. Deyarli hammaga aytadigan bir misolim bor:

Bir o'quvchim bo'lardilar, juda mehrim tushgan, rahmatli buvimga o'xshab ketardi ko'rinishlari. Yoshlar katta bo'lishiga qaramay juda bir ilmga chanqoq kishi edilar. Biz dars beradigan binoda tozalovchi bo'lib ishlardilar. Soat 12:00-13:00 oralig'ida tushlikka vaqt berilarkan, ana shu vaqtda kelib darsga qatnashardilar. Vazifalarni to'liq qilib, yana tushunmaganlarini so'rardilar. Hech esimdan chiqmaydi darslar oxirida bir kuni yig'lagandilarki, Allohga hamd menga qur'on o'qishni nasib qildi, rahmat, ustozjon, deb. Kechikib qolsam ham telefon qilib dars bo'ladimi yo'qmi darrov so'rardilar, binoda svet o'chgan bo'lsa ham telefon qilib xabarini berardilar, xullas, roza bir ilmga chanqoq kishi edilar.

U kishi qatori boshqa ishchilar ham bor edi kursga qatnashadigan, hamkasblari. Lekin u kishidek darsga shoshmasdi, darsga diqqat qilmas edi. Yozib keling desam yozib kelib, ertasi darsga tekshirtirardi, savol bormi so'rardi shu ayol. O'ylab qolaman, qayerda qoldi ilmga rag'batli shunday insonlar ?

Gap yoshdami? Bu odam yoshi bir joyga borganini sezib, vaqtni g'animat bilib shuncha harakat qilyaptimi? Unaqada hamma yoshi kattalar kursga borganda shunday jahd qilishi kerak bo'lardi, lekin ayrimlari hali xotirasi chatoqligidan, hali nevaralarga qarashi kerakligidan, hali qayeridir og'riyotganidan nolib darsni yarmini o'tkazib yuboradi.
Gap yoshda bo'lsa, kim kafil yoshroq odamlar ertaga vafot qilmasligiga?

Ilmga rag'bat, muhabbat ham bir ne'mat bo'lsa kerak-a? Bu ne'matdan mahrumlar qancha? Balki, bu ne'mat tarqatilayotganda ular instagramda reels ko'rib o'tirishgan bo'lgandir ?
Foydasi bo'lsa, davom eting. Albatta, umringiz oxirida nimadan ko'proq foyda olar edingiz, bilib olasiz. Lekin unda biror nimani o'zgartirish uchun juda kech qolgan bo'lasiz.

*Bintu Malik

Balki ayb mandadir )

#misra

So'fiylarga suhbat kerak
Zohidlarga jannat kerak
Majnunlarga Layli kerak
Menga Sen keraksan, Sen kerak

Allohga ayt
Ya Allohim, man jannatni nima qilaman? Jannatni ham Sen yaratgansan, meni ham O'zing yaratgansan. Jannat ham men kabi bir yaratiq bo'lsa, jannatni men nima qilaman?
Men Seni istayman, bir Seni

*tarjima

Qur'onni hurmat qilish ham asli bir hidoyat bo'lsa kerak.

#shaxsiy_fikr

Gapirsam, hamma narsani rozilik, iymonga taqayveradimi, deyishlari mumkin. Ha! Bu hayotda hamma muammoning yechimi Allohga to'kis iymon keltirishda.

Ota-onasini, qaynona-qaynotasini, turmush o'rtog'ini yoki boshqalarni kechirolmaslik, bo'lib o'tgan ishlarning dilda chuqur asorat qoldirishi, stres va depressiyaga berilish, bolalik travmalari... - hamma hammasi borib taqdirga norozilik, Allohga bo'lgan iymonning sustligiga taqaladi.

Negaligini tushuntirishga harakat qilaman:

Ota-onani farzand o'zi tanlamagan. Shunday ota-ona qo'lida tug'ilishi taqdirida bitilgan edi. Endi u ota-onasidan norozi bo'lishi taqdiridan norozi bo'lishiga teng. Hammaning sinovi turlicha, kimdir farzand berilib, boshqasi farzand berilmay sinaladi. Yana kimlardir ota-ona bilan, boshqalar esa ularsiz yashab sinaladi. Demak, sizning sinovingiz shu ekan. Shu sinovda o'zingizni qanday tutishingiz, sabrli bo'lishingiz, har ishda Allohning hikmati borligini anglashingiz katta ahamiyatga ega.

Alloh nuqsonlardan pok zot, hech narsani behikmat yaratmagan. Turmush o'rtog'ingiz yoki qaynonangizning qaysidir ishi sizga yoqmasligi mumkin, lekin bu balki sizning sinovingiz.

Kechirmaslik boshqaga ziyon keltirmaydi. Bu yuk bilan kechirilmaganlar emas, kechirmaydigan odamlar yashashadi. Og'irlik ularning o'zigagina bo'ladi. Nima uchun?

Jamiyki olamni yaratgan, insonni yo'qdan bor qilgan, uni turfa ne'matlar bilan siylab qo'ygan Alloh taolo bandasi biror gunoh qilsa, kechirishga tayyor turadi. Siz-u biz nimamizga buncha katta ketamizki, kimdir qilgan xatosidan dilimiz og'rir ekan va ularni hech ham kechirmas ekanmiz? Kim bo'libmiz?

Fitratga qarshi borish, o'ziga haddidan ziyod baho va qiymat berish vijdonga, qalbga og'irlik keltiradi. Shu sabab ham kechirmaydiganlar, qalbida olib yuradiganlar doimiy og'ir yuk ostida yashaydi.

Alloh oldida qanchalar ojiz ekanligingizni anglang. Asl fitratingizga qayting. Shunda qalb halovatiga yetasiz😊

*Bintu Malik

#misra

Sen yaratgan olamu inson go'zal,
Sen yuborgan Mustafo, Qur'on go'zal,
Sen buyurgan har amal, iymon go'zal,
Ruhlar ichra sunganing vijdon go'zal,
Bu go'zalliklar jamolingdan Sening!

Har ishing, har so'zu ahkoming buyuk,
Ham jazoying, hamda in’oming buyuk,
Qilganing insonga ikroming buyuk,
Jannatingdek dini Isloming buyuk,
Bu buyukliklar jalolingdan Sening!

Sen yaratmish ikki dunyoying tugal,
Har sifoting, hamma asmoying tugal,
Barcha manglaylarda imloying tugal,
Dillar ichra chekkan imzoying tugal,
Bu tugalliklar kamolingdan Sening!

Husaynxon Yahyo Abdulmajid

Dunyodagi eng go'zal ifor 2 ta bo'lsa, biri onaning hidi, boshqasi yangi tug'ilgan chaqaloqning hisi bo'lsa kerak )

Alloh nasib qilsin, onamning ham, bolamning ham hidiga to'yay )

*

Tanadagi hamma a'zoning o'z vazifasi bor. Oyoqlarning vazifasi yurish. Agar yurish kerak bo'lmaganda Alloh taolo bizni shilliqurtsimon yaratgan bo'lardi, balki

- Ummu Umayr.

#shaxsiy_fikr

Bir xaridorim bor, 97 ga kirgan bir o'zbek ayoli "bolam, yashagim keladi" deydilar. Nimaga deb so'rasam, "kitob o'qiymanda, davomini bilgim keladi, yashagim keladi" deydilar

- Xayrulla Asatov.

Nimaga saviyali kontentlar topga chiqmay qo'ygan? Nimaga kimlarningdir to'yi, merryme'si, hajviy videolari millionlagancha prosmotrlar yig'adiyu, ilm olishga targ'ib qiluvchi kontentlar chetda qolib ketadi.

Gap montajdami? Instagram algoritmidami? Yo'q. Gap bizda. Axlat chelakdan nima farqimiz bor? Farqimiz biz shunchaki odammiz, jonimiz bor. Lekin nima berilsa, o'shani qabul qilaveramiz axlat chelak kabi. Ma'noli gap aytyaptimi, ma'nosizmi, bo'ladimi yo'qmi.

Avaz Oxunning konsertini ko'rdim bir kuni. Haligi aytilayotgan gaplarga aslida yig'lash kerak. Odamlar uyerga kulgani borganda,har gapga gap ekan deb kulishyapti. Lekin aslida yig'lash kerak, sababi haqiqatlar gapirilyapti.

O'zbeklikdan jar solamiz, lekin millat sifatida na fitratimiz qolyapti va na boshqasi. Ko'zni ochadiganlarni ko'z ko'rmas joylarga surgun qilishyapti. Yana uyg'otishdan gapiramiz.

Xullas, ochilmasin mening gap qopim. Gapirsam o'zimga ziyon bo'ladigan davrda yashayapmiz.

Qog'oz narxi oshganini hojatxona qog'ozining narxidan bilgan odamlar..
O'ylayvering ular qayeri bilan o'ylashini.
Nima millatga aylandik biz ?

- Xayrulla Asatov.

*

Din odamlarni har ishni mukammal qilishga chaqiradi.

İshingizni mukammal qilolmasligingizni boshqalarga yuklamang. Sizga kerakmi - Siz harakat qiling. Yetarlicha harakat qilmaganingizdan keyin boshqaga "sen ham falon qilsang bo'lardiku" demang.

Men kanalni bilgan, o'rganganlarimni ulashish uchun ochganman. O'zimni tanitib, odamlar orasida hurmat qozonish uchun emas. Qaysidir ishingiz menga yoqmay, o'shanga yarasha muomala qilganimda yoki o'z haqimni talab qilganim sizga yoqmaganida, menga nisbatan hurmatingiz tushgan bo'lsa, xursandman. Siz buni kibr deysizmi, boshqami, o'zingiz bilasiz. Kibr nimaligini bilmasligingiz mening aybimmas.

Men siz meni hurmat qilishingiz uchun ilm olib, kanal yurgizmayapmanki, endi menga nisbatan hurmatingiz tushishi meni xavotirga solsa.
Milliarderni bolasi bo'lmaysizmi, xato ish qildingizmi, xato deyiladi. Yoqmaydimi, burningizni tishlang !

Dinni har narsaga aralashtiravermang bilib-bilmay.

*Bintu Malik !

#shaxsiy_fikr

Gohida ustozlar beradigan tanbehlari noo'rindek tuyuladi, xafa bo'lamiz. O'ylaymizki, ustoz viz qilayotgan sa'y-harakatlarni inobatga olmay, bizni nohaq urishdi, aybladi, dilimizni og'ritdi. Aslida esa, ustoz siz harakat qilsangiz, nimalar qo'lingizdan kelishini bilganidan sizni koyiydi, dangasaligingiz uchun malomatlaydi.

Umuman olganda talaba ustozning tanbehlaridan nima uchun xafa bo'ladi? Axir, ilmni ustoz uchun emas Alloh uchun olyapsiz. Ustoz bu yo'lda bir yo'llovchi xolos. Demak, xatolaringizni aytish, sizni tetiklantirib turish, koyish, kezi kelganda qattiq gapirish ham uning vazifasi. U vazifasini qilyapti, siz bundan faqatgina xursand bo'lishingiz kerak.

Lekin, tanbeh doim nafsga og'ir botgan toki nafs tarbiya qilinmaguncha. Ustoz bergan vazifalar va tavsiyalar bilan cheklanib qolayotgan aslida - siz - xato qilyapsiz. Nimaga qo'shimcha manbalarni izlamaysiz, boshqa onlayn platformalardan sizni qiziqtirgan savollarga javob topmaysiz, vazifa 5 marta takrorlash bo'lsa, 50 marta takrorlamaysiz ?
Ustoz o'rgatganiha qanoat qilmay yana talab qiling, ustoz buchi, buchi deb so'rang. Ustozning ham himmati oshib, sizga ko'proq narsa o'rgatishga shoshadigan bo'ladi keyin. Sababi ilm ilmga himmatli kishilargagina o'rgatilishi kerak.
İlmni qadrini bilgan, qadriga yetadigan, bu yo'l qanday mashaqqatli ekanini fahmlagan va bu mashaqqatlarga tayyor kishilargagina ilm o'rgatish kerak.

*Bintu Malik

#misra

Farzand o'g'il bunyod ota jonidan,
Qiz dunyoga kelar ko'ngil qonidan.

Bazi qizlar yaxshidir o'g'il boladan )

Oq deb bilgan narsamning qoraligi bilishdan qo'rqmayman.
Shuni oq deb o'ylab behuda o'tkazgan vaqtimning nadomatidan qo'rqaman.

#shaxsiy_fikr

Shunday narsalar bor 24 soat playlistingizda aylansa ham, eshitib to'ymaysiz.

Men musiqaning harom/halilligi xususida bahslashmayman. Musulmonlar orasida nifoq chiqarish niyatim yo'q. Ham bu ixtilofli masalada kim qaysi yo'lni tutsa, o'shanda haq.

Lekin, shuni bilamanki, musiqa kishini dangasa qilib qo'yadi. Boshimizdan o'tgan, musiqa eshitganimiz sari eshitgimiz kelar, ish qilayotganda ham musiqa qo'yamiz, uxlaganda ham, dars qilganda ham. "İye, dars qila turibam musiqa eshitasanmi?" Deyishsa, ha yaxshiroq fikrim jamlanib, uyqum qochadi, derdik.
Aslida esa unda odamni rom etadigan shunaqa xususiyat bor ekan. Ammo, musiqa eshitib foyda topgan hech kimni ko'rmadim. Vaqti zoye ketgan, o'ta hissiyotlarga beriluvchan bo'lib qolgan, negadir musiqasiz yurolmaydigan, turolmaydigan, o'tirolmaydigan bo'lib qolgan.

Xullas, playlistingizda 24 soat takrorda tursa ham sizni zeriktirmaydigan, aksincha har eshitganda zehningizni ochadigan, dunyoga qarashingizni o'zgartiradigan narsalar bor

- audiokitoblar
- maruzalar
- qur'on tilovati.

Audiokitob va maruzalarni ish qilib eshitsam, hayolimga kirmaydi baribir, deb bahona qiladiganlarga javobim:
Kirmasa kirmas! Siz eshiting, 1 marta emas, 10 marta eshiting. Yod bo'ladi in shaa Alloh

Qur'on tilovatini ish qilib eshitib bo'lmaydi, unj eshitayotganda o'tirib tafakkur qilish kerak, deydiganlarga javobim:
Shundoq o'tirib, qur'on eshitib tafakkur qilyapsizmi, ho'p? Yo'q. Demak bu shunchaki bahona, shaytonning vasvasasi. Hayolingiz boshqa joyda bo'lsa ham, Allohni zikr qilavering. In shaa Alloh, Alloh taolo qalbingizni zikriga ochib qo'yadi.

Xullas, har soniyangizdan unumli foydalaning )

*Bintu Malik.

*

Agar seni Rosululloh ﷺ ko'rganida edi..
Albatta yaxshi ko'rgan bo'lar edi ..

#tavsiya

Ona qornidagi bola chiroyli bo'lsin, o'zi ham, husni ham, xulqi ham chiroyli bo'lsin, sog'-salomat bo'lsin, desangiz Alloh taoloning ismlaridan al-Musovvir ismini ko'proq zikr qiling.
al-Musovvir nima degani?
Har narsaga go'zal bir shakl, ko'rinish beruvchi degani.

*Tarjima

Allohning ismlarini o'rganish Allohni tanishga eltuvchi yo'llarning biri. Va endi shu ismlarni shunchaki o'rganibgina qolmay, bu ismlarni duo qilayotganda ham aytish duo ijobatini tezlashtiradi .

Allohning ism va sifatlarini bilish kishi boshiga biror mushkula tushganda ham uni noumid bo'lmaslikka, muammoda yechim topa olishiga ishontiradi. Qalbi huzur-halovatda bo'ladi.

Qayerdan o'rganaman desangiz, Allohning ism-sifatlari xususida asma-ul husna maruzalar to'plami bor, Allohning go'zal ismi bor kabi kitoblar bor.

Men esa aksarga "Chunki sen Allohsan" kitobini tavsiya qilaman, hamma qismini. Uni hozir o'qing, yarim yil o'tgach yana bir o'qing. Manolarni boshqacha tafakkur qilasiz o'shanda.

*Bintu Malik

#shaxsiy_fikr

Biz butun hayotimiz davomida hayotimizni yengillashishi, ishlarimiz yaxshilanishi uchun turli yo'llar izlaymiz. Oxir oqibat Alloh nasib qilsa, eng mukammal yechimni Allohning buyruqlarida va Rosululloh ﷺ vasiyatlarida topamiz.

Bir kun xohlasangiz ham, xohlamasangiz ham Robbingizga qaytasiz. Rosululloh ﷺ shafoatlarini istab qolasiz. Qur'on shafoatchi bo'lishini tilab qolasiz. Qaniydi, yana bir kun umr berilsa edi, 24 soatni hammasida ibodat qilardim, tavbalar qilardim deysiz.
Lekin, kech bo'ladi.
Xohlamasangiz ham, xohlasangiz ham mahshargohda yig'ilasiz, gunoh-savoblardan so'ralasiz.

5 vaqt namozimni o'qiyapman, yana nima qilay, demang.

Bu namozlar qanchalar mukammalligi Allohgagina ayon. Uning rahmati bo'lmasa, bu namozlar birgina ko'z ne'matining haqini ado etolmaydi.

Rosulullohﷺ ni bilaman, yana nima qilay, demang.

Ayollari, farzandlarini nomma nom sanab bering. Hech bo'lmasa 10 ta hadisni so'zma so'z bo'lmasa ham, ma'nosini ayting va amalda qo'llang.

Qur'on o'qiyapmanda, yana nima qilay, demang.

Nima o'qiyotganingizni o'zingiz tushunmaysiz, to'g'ri o'qiyapsizmi yo'qmi - bilmaysiz. Suralar nomi nima ma'noni anglatishini bilasizmi? Ularning o'zi qanday mohiyatga ega, bunichi?

O'rganadigan narsamiz ko'p, qaysi biriga ulguraman?

Eng keraklisiga 1-ulgurib qoling. Ikki dunyongizni obod qiladiganiga shoshiling. Instagram, telegramni butunlay yig'ishtiring demayman. Sizga shu yuqoridagilarni eslatadigan sahifalarni kuzating toki nima uchun yashayotganingiz, vaqtingiz juda kam ekanligini eslatib tursin.

*Bintu Malik