АЁЛЛАРНИНГ РАШКИ ЁМОН БЎЛАРКАН.

Уйланишнинг кўпдир яхши томони,
Ярим кўнглинг бағир билан тўларкан.
Аммо айтай сизга битта ёмони,
Аёлларнинг рашки ёмон бўларкан.

Қизғонади кампирдан ҳам, қиздан ҳам,
Қизғонади ногоҳ боққан кўздан ҳам.
Қутулмайсан ошиб кетсанг юздан ҳам,
Аёлларнинг рашки ёмон бўларкан.

Излаб юрар ҳар нарсадан севгини,
Ҳидлаб турар кўйлак ёқа енгини.
Ўйламайди тенгимасу, тенгини,
Аёлларнинг рашки ёмон бўларкан.

Изингиздан кўп юргани рашкидан,
Узоқлашса чақиргани рашкидан.
Сочимизни тўкилгани рашкидан,
Аёлларнинг рашки ёмон бўларкан.

Бўйдоқликда рашк қилишса кулардим,
Рашк қилганда бундан хурсанд бўлардим.
Қиз боланинг рашки ёмон билардим,
Аёлларни рашки ёмон бўларкан.

Севганидан қизғонади биламиз,
Гоҳи кулиб гоҳи сочни юламиз.
Пешонада энди нима қиламиз,
Аёлларнинг рашки ёмон бўларкан.

Унутмасин асло шуни аёллар,
Уйимизда доим бизни хаёллар.
Эх аёллар буни қачон биларкан,
Аёлларнинг рашки ёмон бўларкан.