Нега кўнглингизга қўнибди ғубор,
Ёки хомуш бўлиш замон зайлими?
Сизга кичиккина илтимосим бор:
Бир ширин табассум қилинг, майлими?

Фаромуш ўй суриб, ўртанмай ғамда,
Яшамоқ керакку ёруғ оламда.
Ҳеч нима демангу, фақат шу дамда,
Бир ширин табассум қилинг, майлими?

Сизни ўйлайману, кўнглим ҳавотир,
Қалбингиз очмайсиз, этиб юз-хотир,
Дилим ҳотиржаммас, шу сабаб ҳозир, 
Бир ширин табассум қилинг, майлими?

Майли замин узра бўлмасин баҳор,
Кўкламга умрбод бўлай интизор,
Муштоқ юракларни айламай зор-зор,
Бир ширин табассум қилинг, майлими?

Умид машъалига бағишлаб учқун,
Уфқдан субҳидамда чиққандайин кун,
Шу онда, хабарим оқиб, мен учун,
Бир ширин табассум қилинг, майлими?