Shunchaki yuragim entikardi ko'p,
Hislarning tog'idan toshday qulardim.
Men sevgi neligin bilmasdim,
Xudo !
Faqat oshiqlarga havas qilardim.

Javob ber !
Sendan ishq so'raganmidim ?
Qaysi kunlarimning qaytimin oldim ?
Yetakla.
Yo qulat.
Yoki yo'l ko'rsat !
Bir yashar boladay adashib qoldim.

Mening o'zim qani , mag'rur,bo'ysunmas ?
Muzday yuragimga bitta quyosh ber.
Ozodlik istayman-ko'nglimni afv et ,
Yo bardosh ber menga ,
Va yo ko'z yosh ber !

Munchoqday ko'zlarga sig'inib qoldim,
Peshonamni yorar rashkning mushtlari.
Yashashga undasa bitta tabassum-
O'limni eslatar sog'inishlari...

Cho'pchakka o'xshaydi bu miskin dunyo,
Sendagi ishq bilan men uni suydim...
Uyqusiz kechalar topmadim izlab,
Qaydadir aqlimni tushirib qo'ydim...

Sening nigohlaring qiynaydi meni.
Navoman !
G'azalman !
Yomg'irman !
Nayman !
Ko'nglimga bandangning ishqini solib -
Xudo !
Huzuringga qanday borgayman ?...

✍ Zuxriddin Karimov

@sevgi_haqida_sherlarimiz