Rukhshona's blog

​​#nazm

Oydin kecha.
Yog‘ar ko‘kdan zar ,
O‘yga cho‘mib deding gul yuzim:
“Osmon to‘la sonsiz yulduzlar,
Qaysi ekan mening yulduzim?

U bir kichik zarradir, xolos,
Yiroqdadir, ilinmas ko‘zga...”
Ajab deyman, kim etmish qiyos
Odamzodni so‘nik yulduzga?!

Qalb ko‘ksimda yonib o‘rgangan,
E’tiqodim shu erur azal :
Ming yil xira yulduz bo‘lgandan ,
Bir dam yoniq sham bo‘lgan afzal.

Asriy hayot kerakmas menga,
Ishq zavqiga qonib yashasam,
Parvonaning umri bas menga —
Faqat yonib, yonib yashasam.

Shu o‘y meni band etar ko‘pdan,
Shu sababli deyman: gul yuzim,
Yulduz izlab netasan ko‘kdan,
O‘zingsan-ku mening yulduzim.

O‘zingsan-ku mening yulduzim,
Surayyodan, Zuhrodan ortiq.
Ko‘k tokidan olmadek uzib,
Birin senga qilaymi tortiq ?

Kel, istasang oy xalqasini
Qulog‘ingga taqay, dilbarim.
Xushnud etsa yulduzlar seni,
Etagingga to‘kayin barin.

Faqat, jonim, o‘zingni zinhor
Yulduzlarga etmagil qiyos.
Yonib yasha to tanda jon bor,
Quyosh bo‘lgin, azizim, quyosh !

©️Erkin Vohidov

@rukhshona_blog

​​#taqriz

“…shunaqa mehribon, ishonuvchan bo’lganimiz, biz bilan nima istashsa, shuni qilganlari - o’zimizning aybimiz, gunohimiz!”

©️ Stefan Sveyg “Kristina”

Kitobni o’qir ekanman, boy va nochorlar o’rtasida qanchalik katta ko’prik borligi, urush oddiy insonlarning yoshlik yillarini o’g’irlab olganligi, endi esa ularga na moddiy, na ma’naviy yordam borligiga achindim.💔

Asarning asosiy qahramoni Kristina — murakkab taqdirga ega bo‘lgan ayol. Uning ichki dunyosidagi azob-uqubatlar, qarorlar qabul qilishdagi ikkilanishlar va jamiyat bosimi bilan kurashishi o‘quvchini o‘ylashga majbur qiladi.

Stefan Sveyg asarda qahramonlarning ruhiy kechinmalarini chuqur tahlil qilgan. Kristinaning obrazini yaratishda uning irodasi, ichki mustaqilligi, sevgi uchun kurashi, kiborlar hayotiga bo’lgan tashnalik yaqqol ko‘zga tashlanadi.

Asarda qahramonlarning ruhiy holati aniq va ta’sirchan tarzda tasvirlangan, bu esa o‘quvchini o‘ylantiradi va qahramonlarning his-tuyg’ularini chuqurroq anglashga undaydi.

Stefan Sveygning “Kristina” asari inson ruhiyati va hissiyotlari bilan bog‘liq murakkab savollarga javob beruvchi kitobdir. U insoniyat tarixidagi qiyinchiliklar va ularni yengishdagi irodani aks ettiradi. Ushbu asarni o‘qish orqali siz nafaqat badiiy zavq olasiz, balki inson tabiatini ham chuqur kashf etasiz.

@rukhshona_blog

​​#iqtibos

Kim shod-u xurramlik bilan to’lib-toshgan bo’lsa, sergaklikni yo’qotadi: baxtiyor insonlar - eng yomon ruhshunoslar. Faqat boshdagi tashvishgina aqlni juda charxlaydi, faqat xavfni payqashgina ko’zni kattaroq ochadi va o’tkirlashtiradi.

©️ Stefan Sveyg “Kristina”

@rukhshona_blog 📚

​​#taqriz

Agar g’am-tashvishsiz hayot kechirmoqchi bo’lsangiz, Dostoyevskiyni o’qimang!

Yoshligimda kitobjavonimda hozirgichalik ko’p kitoblar bo’lmasdi. Faqatgina klassik adabiyoti durdonalari bo’lardi. Tolstoy, Aleksandr Dyuma, Tomas Mayn Rid, Stendal, Tsitseron, Dostoyevskiy va boshqalar. Klassik adabiyotga va umuman, kitoblarga bo’lgan qiziqishim “If qal’asining maxbusi” asaridan boshlangan. Shu asarni o’qiganimdan keyin ko’plab kitoblarni o’qidim, tushundim, kitobdagi qahramonlarning hayotida yashadim.

Bir kuni kitob javonimda Dostoyevskiyning “Jinoyat va jazo” kitobini oldim, ochib qaradim, eng ko’pi 10 bet o’qidim va kitobni yopib qo’ydim. Dostoyevskiyning kitoblarini endi ochib ham qaramayman dedim. Chunki hech nimaga tushunmagandim (adashmasam bu voqea 7-8-sinflarimda ro’y bergan). 2024-yilning yoz oylarida yana Dostoyevskiy asarini qo’limga oldim. Varaq ketidan varaq o’qildi va o’zimga o’zim “Kitob shuncha payt kitob javonimda turgan. Men shuncha payt nima qilib yurdim?”, deya savollar bera boshladim. Haqiqatdan “Jinoyat va jazo” buyuk asar. Har holda mening sevimli asarim. Ko’pchilikning sevimli asari. Shunda nima uchun Dostoyevskiy buyuk yozuvchi ekanligini teran tushunib yetdim.

Bugun Dostoyevskiyning “Oydin tunlar” nomli kichik hajmdagi romanini o’qidim. Roman juda ham kichik hajmda. Bor-yo’g’i 57 bet. Lekin xuddi 570 betli kitob o’qigandek bo’ldim. Oxiridagi misralar yuragimni junbushga keltirdi.

Eh Nastenka, Nastenka… Bir yigitni juvonmarg qilding-a?! So’z berdingmi, rejalar tuzdingmi, oxirigacha so’zingda tur edi. Kim nima desa desin, lekin men bosh qahramonga achindim. Aslida bu voqeada uchchala qahramonni ham ayblab bo’lmaydi. Lekin men uchun Nastenka baribir xatolikka yo’l qo’ydi.

Asarni o’qing! Chindan ham o’qishga arziydigan roman!

@rukhshona_blog