Bugun eng aziz, eng ulugʻ bayramimiz – mustaqilligimizning 33 yilligini nishonlamoqdamiz. Buyuk Amir Temurning “Eng baland minora ham yerdan ko‘tarilgay” degan ko‘hna falasafasi barcha ezgu ishlarning ibtidosiga ishoradir. Xuddi shu ma’noda, Mustaqillik xalqimiz uchun yangi tarixiy davrning boshlanishi bo‘ldi. Istiqlol yillarida yurtimizda yangi davlat va jamiyat qurish yo‘lida tarixiy ishlar amalga oshirildi. Darhaqiqat, istiqlol tufayli o‘zligimizni angladik, ozod xalq, mustaqil davlat sifatida O‘zbekistonning bor bo‘y-bastini, ulkan salohiyatini butun dunyoga namoyon qilish imkoni ochildi. Aynan shu imkoniyatlardan biri, shubhasiz, Alisher Navoiy nomidagi Toshkent davlat o'zbek tili va adabiyoti universitetining tashkil etilishi bo'ldi. Universitetimiz mamlakatimizda va xorijda o'zbek tili, adabiyoti va madaniyatini ilmiy o'rganish, targ'ib qilish, shu sohada faoliyat olib boruvchi kadrlarni tayyorlashni maqsad qilgan. Biz ushbu maqsad yo'lida dadil odimlamoqdamiz. So'nggi yetti yildagi erishgan natijalarimiz, amalga oshirilgan ishlar buning yaqqol dalilidir.
Universitetimiz pedagogik jamoasining ilmiy salohiyati yildan yilga oshib, safimiz yosh va umidli kadrlar bilan kengayib bormoqda. Bizning bitiruvchilarimiz mamlakatimiz va xorijda o'zlarining ilmiy, pedagogik faoliyatlarini olib borib, katta muvaffaqiyatlarga ham erishmoqdalar. Bundan tashqari joriy yilda talabalarimiz safiga yana ko'plab iqtidorli, ijodkor, intiluvchan yoshlar qabul qilindi.
Dilimizni quvnatadigan shunday natijalarning barchasini bizga mustaqillik bergan cheksiz imkoniyatlar samarasi deya baholash mumkin.
Aziz hamkasblar va talabalar!
Yana bir bora barchangizni ushbu qutlug' ayyom bilan tabriklayman. Kelgusi yil shunday shodiyonalarda qatorimizdan xato boʻlmay, bir-birimizni qutlash barchamizga nasib etsin!

Shuhrat Sirojiddinov
Alisher Navoiy nomidagi ToshDOʻTAU rektori, akademik