Savob asli samodan tushmas,
Tillo yerga gadodan tushmas,
Ko'kda uchgan har jonzot qushmas,
Yerda yurgin ucha bilmasang,
Tugun tugma yecha bilmasang.

Mezbon itin bo'shatib qo'ymas,
Osh bergan zot oshatib qo'ymas,
Hasad ahli tosh otib to'ymas,
Chayon bo'lma chaqa bilmasang,
Kir tutmagin yoqa bo'lmasang.

Yetim yotgan ostona bo'lgin,
Onang o'pgan peshona bo'lgin,
Gul shoxiga bir shona bo'lgin,
Qo'l cho'zmagin uza bilmasang,
Baliq bo'lma suza bilmasang.

Tun bergan zot chiroq ham bergan,
Yoving bo'lsa yaroq ham bergan,
Oxiratdan saboq ham bergan,
O'qish nechun uqa bilmasang,
Ko'lmak bo'lgung oqa bilmasang.

Tangri senga til bergan, ey do'st,
Shukri uchun til bergan, ey do'st,
Neki bersa chin bergan, ey do'st,
Mahmud, tek tur so'zlay bilmasang,
Bulbul bo'lma bo'zlay bilmasang.