СЕВИЛГАНИНГ ЁЛҒОН, СЕВГАНИНГ ЁЛҒОН

Умид қилолмасанг рашк қилолмасанг,
Ошиғинг чашмида ашк бўлолмасанг,
Ҳажрида ҳар куни минг ўлолмасанг,
Севилганинг ёлғон, севганинг ёлғон.

Йироқдан нигоҳи тушса кўзингга,
Ўртанса зор бўлиб битта сўзингга,
Аммо ёр бўлмаса мангу ўзингга,
Севилганинг ёлғон, севганинг ёлғон.

Жиловла, туйғулар алдар кўсадир,
Дардларинг ажриқдай тинсиз ўсадир,
Ғунчанинг сўлмоғи битта бўсадир,
Севилганинг ёлғон, севганинг ёлғон.

Билмайсан, ичганинг ишқ шаробими?
Ёки лайн ҳийласи, нафс саробими?
Надомат ортса гар ғам азобини,
Севилганинг ёлғон, севганинг ёлғон.

Асли най яралган қамиш жонидан,
Қумурсқа ипакдир ўлик онидан,
Ёр учун кечмасанг  жон жаҳонингдан,
Севилганинг ёлғон севганинг ёлғон.

Ёндиргин, кул бўлсин кўксини уриб,
Фарёд ур парвонанг ҳолини кўриб,
Нилуфар кетмасанг шам каби эриб,
Севилганинг ёлғон, севганинг ёлғон.

❣️❣️❣️❣️💯❣️❣️❣️

@qadrdonim2021
❤️ҚАДРДОНЛАРИМ❤️