O'zini sevib yashash—qandayam baxt bir qara
Eski yo yangi o'ylardan qalbing bo'lmaydi yara
O'zingga mos ko'rdingmi yurish dardni ko'tarib
His qilmaysanmi axir, ruhing tortmoqda na'ra!

Zabt ko'tarilgan taning nimani idrok etar
Xuddi katta kalamush poygada ishtirok etar
Bir xillar ko'p bo'ladi, ba'zan istisno ketar
Chalkash ketmish hayoting boshingni sarak etar!

To'ldirding bazmlarni xayolingda orzu bo'ldi
Qilgan eng katta rejang "ishchi" degan yozuv bo'ldi.
Uringaning natijasi aqllardan ozuv bo'ldi.
Fikr etmoq—og'ir toshmishki, nafsing tarozu bo'ldi.

Yo'lin topgan so'z aytmadi, yurgan yo'lidan qaytmadi
Boshqa bilan ne ish bor, deb hech vaqoni so'ratmadi.
O'ying haqni yo'qlatmadi, ko'zing rostni ko'rsatmadi
Oqdi jisming vulqon kabi, lek bukringni tuzatmadi.

Sirlashganing sarob bo'lar, istaganing xarob bo'lar
Bu ketishda, bilmadim-da, bor ulfating sharob bo'lar
Tomiringdan qoning chiqib, o'rnashgani zardob bo'lar
Har begona arbob kabi, har bir kuning sen bop bo'lar.

Fahming jonni do'st tutmadi, yig'laganda ovutmadi
Qoning qaynab har lahzada, o'z-o'zini sovutmadi.
Ruhing bitta imtihondan narisiga *sov o'tmadi
Nafsing seni unutmadi?! Nafsing seni unutmadi!

©Havoi

*Shevada: "sog', sog'lom"