#mantiqsizlik
- Oʻgʻlim buzuq ayolga ilakishib qolibdi. Yashshamagurga yaxshi bir qiz topib uylantirsam, zora quyulib qolsa...
- Shu oʻgʻlim akalariga oʻxshamadi, oʻta tanbal. Biror ishning boshini tutay demaydi. Uylantirsam, roʻzgʻorni qanday eplaydi, hayronman!
Ha-ya, epchil-chaqqongina, qoʻlida hunari bor qizlardan taniganingiz boʻlsa, tavsiya etvoring...
- Katta oʻgʻlimning feʼli xunuk, sal narsaga lovullab, jahllanib, urishib ketadi. Bunga ogʻir-vazmin, sermulohaza, yaxshi tarbiya koʻrgan qizni oberishim kerak...
- Shu desangiz, kichik oʻgʻlim bizdan yashirincha ichib-chekadigan odat chiqargan. Kechqurunlari allamahalgacha koʻcha kezadi, shu paytgacha qayerda eding degan odam naq baloga qoladi! Halol-haromni farqlaydigan, ibodatli, muslima qiz boʻlsa, shunga obersam. Xotini aqlli boʻlsa, yomon yoʻldan qaytarib oladi-da...
Oʻz tuqqanini tarbiya etolmagan onalarning bedavo oʻgʻil uchun «davo vositasi» bu.
Bir onaning oʻz bolasi rohatini oʻylab boshqa onaning bolasini azobga duchor etishi mana shunday «tadbir»lardan boshlanadi;
ayolning ayolga zulmi mana shunday fikrlardan boshlanadi;
oilalarning parokandaligi mana shunday «yaxshi niyat»lardan boshlanadi.
«Bunaqa oʻgʻillaringiz xotin emas, psixolog yo psixiatrda seans olsin;
ichuvchi-chekuvchi oʻgʻlingizni yetaklab sovchilikka emas, narkologga boring;
bu oʻgʻillaringizga avvalo odam boʻlish ilmini oʻqiting, keyin nikohlarini oʻqitasiz, muhtaramalar», - deydigan kimsa yoʻq.
Kelin ertaklardagi sehrgar parimi ediki, tayoqchasini bir silkitib, maxluqni shahzodaga aylantirib qoʻysa!
Va umuman, oʻz oʻgʻliga tarbiya bera olmagan, demakki onalik burchini, vazifasini bajara bilmagan ayol boshqa bir oilaning oqila qiziga qayn onalik qilishga qanchalik haqli?
@Toyyibatulittoyyibiyn 🤎
