***

Sen bilan doim bitta magazinda ko'rishamiz;
Bir vaqtda, bir xil mahsulotni olayotgan bo'lasan;
(Menikidek zerikarlimidi, hayoting?)
Har gal kassada, sendan keyin navbatta turaman;
(Mendan biroz barvaqt kelarding,
Jin ursin bu ish jadvalini.
Boshqaga xatoni to'nkashlik-maroq)
O'zgarmasdi soching turmagi;
Ma'budasan-chiroyga har kun.
(Senga bo'yoq emas edi shart!)
Men chiqqunimcha, ketgan bo'lasan.
(Kutgandirsan, menga sezdirmay)
Menga shoshayotgandek tuyilarding,
Boshqalar kabi; Axir, kassachi bilan
Gapni juda lo'nda qilarding.
(Balki, folni ochganman xato,
Yoki qayga oshiqarding sen?)
"Ha, keyingi safar balki ulgurarman senga yetgani", deb
Umrimni o'tkazdim.
(Sen nimani o'ylarding, qiziq;)

Kechadan oldingi kun esa, seni uchratmadim.
Kecha ham, bugun ham.
(Sensiz kunning o'lchovi yildir)
Ishni ortga surmoq-eng katta tovon.

Yerning qaysidir burchagida qayta ko'risharmiz. Kim bilsin.
Afsus, ustiga-ustak, Yer ham dumaloq.
Menda qoldi faqat-
Senga berilmog'i lozim bo'lgan,
Uch-to'rta savol.
Hoynahoy, sen o'sha kun olgan
pistangni ermak qilarsan,
Men esa shu mavhumiyatni.

Axtamov.A