Россиянинг “Championat” нашри ўзбекистонлик профессионал боксчи Баҳодир Жалоловнинг охирги жангини таҳлил қилиб, у ҳақида таниқидий мақола эълон қилди.
5 апрель оқшомида Қозоғистонда профессионал бокс бўйича кечаси бўлиб ўтди ва мусобақада ўзбекистонлик супероғир вазн тоифасидаги Баҳодир Жалолов навбатдаги жангини ўтказди. “Катта ўзбек” узоқ вақтдан бери ҳаваскор боксдаги фаолиятини профессионал ринг билан бирлаштириб, бу ишни жуда муваффақиятли амалга ошириб келаётганди. Баҳодир ҳаваскор боксда икки карра жаҳон чемпиони бўлиб, ўтган йили Парижда бўлиб ўтган Олимпиадада олтин медални қўлга киритди. Ушбу ғалабадан сўнг, Жалолов ҳаваскор боксдаги фаолиятини якунлаганини эълон қилди ва бор эътиборини профессионал рингга қаратишга қарор қилди. Жалолов профрингда 14 та ғалаба қайд этишга муваффақ бўлди. Ўзбекистонлик боксчи ана шундай кўрсаткич билан навбатдаги жангини ўтказди ва унга профрингда 12-2 рекордга эга украиналик Игорь Шевадзуцкий рақиблик қилди. Бунгача Шевадзуцкий Мартин Баколе ва Кубрат Пулев билан жанг қилиб, имкониятни бой берган.
Шевадзуцкий билан жангда Жалолов жиддий фаворит ҳисобланар эди, боз устига Шевадзуцкийнинг бу жангга шошилинч тарзда, ҳеч қандай тайёргарликсиз келгани маълум бўлди. Игорь тарозига ҳам чиқа олмади, яъни у жангдан бир кун олдин Қозоғистонга келишга улгурмади. Бу факторлар фонида Баҳодир рақибини шунчаки, кўрдим демай мағлуб этиши кутилганди.
Жангдан олдинги матбуот анжуманида 30 ёшли Жалолов яна ўз дивизионининг энг кучли боксчилари билан жанг қилишга тайёр эканлигини билдирди.
“Узоқ танаффусдан сўнг, мен профессионал боксда жаҳон чемпиони унвонини қўлга киритишга тайёрман. Мен камарни имкон қадар тезроқ қўлга киритишни хоҳлайман. Мен оғир вазн тоифасида энг яхши жангчилар билан жанг қилишга, жумладан, Усик ва Жошуа каби боксчилар билан жанг қилмоқчиман”, дейди Жалолов.
Дарҳақиқат, Жалолов-Шевадзуцкий жанги ўта шиддатли руҳда кечди, кутилганидек, Жалолов баҳсни юқори темпда бошлади, ўзбекистонлик боксчи 3-раундда рақибини нокдаун ҳолатига туширди, лекин секин-аста жанг темпи стабиллашди, секинлаш, клинчга ўтишлар бошланди ва тўқнашув тўлиқ 10-раунд давом этди. “Катта ўзбек”нинг темпни тушириши табиийки, мухлисларнинг ҳуштакбозликларига сабаб бўлди ва ҳатто айрим мутахассислар унинг профбоксдаги истиқболига шубҳа билан қарай бошлади.
Жалолов ҳозир 15-0 рекордга эга, у профессионал фаолиятида биринчи марта рақибини нокаутга учрата олмади ва Шевадзуцкий унчалик жиддий рақиб эмас эди. Баҳодир ўта оғир вазнли бўлиб, оёқ машқлари ва аниқ техникадан фойдаланган ҳолда рақибларини муддатидан аввал таслим этарди, яъни у шунчаки ҳаваскор услубини профессионал рингга ўтказган, бироқ Жалоловнинг бу услуби у учун яхшилик билан тугамаслиги мумкин. Жалолов ҳозирги услубида жуда кўп энергия сарфлайди. Ҳаваскор боксда Баҳодир Жалоловнинг функционал ҳолати бешта раунд учун етарли бўлса, 10-12 раундлик профессионал боксда у тез чарчаб қолади. Унинг икки карра Олимпиада чемпиони эканлиги профессионал боксда ҳеч нарсани англатмайди.
Бундан ташқари, Жалолов анча монотон ҳаракат қилади. Шевадзуцкий билан “ўнг жаб - чап тўғри” комбинацияси фойда берди. Рақиб ўнг қўли билан жағини ёпганда ҳам Баҳодир Жалолов услубини ўзгартирмади, Жалолов битта комбинация асосида жанг ўтказди.
Профбоксда услублар жанг қилади, лекин Жалолов ҳозирда рингда кўрсатаётган нарсадан келиб чиқиб айтадиган бўлсак, унга, топ-жангчилар рингда тўқнашиш оғирлик қилади. Жалолов чемпионлик жангида қатнашиш истагида бўлишига қарамай, у ҳозирги ҳолати билан камарлардан жуда узоқда. Жалолов Александр Усикдан ўрнак олиши, услубини ўзгартириши ва аста-секин рақибларини кучайтириши керак. Агар “Катта ўзбек” Фабио Вардли ёки Мартин Баколе каби боксчилар билан тўқнашиб қолса, жанг сценарийси ўзбекистонлик бокчи учун салбий якунланиши мумкин.
Жалоловнинг олдида жуда кўп қилиниши керак бўлган ишлар турибди ва у яқин вақт ичида чемпионлик жангларини умид қилмаса ҳам бўлади.
@mysportuz
