"МУШТУМ" журнали расмий канали 📰

Каналимиз обуначисидан

ТЎЙ ҚИЛАДИ ЎЗБЕГИМ

Мағрибу машриқ чопиб,
Меҳнат қилиб пул топиб,
Каму кўстини ёпиб,
Тўй қилади ўзбегим.

Армонларин ўлдириб,
Дастурхонни тўлдириб,
Элу юртга билдириб,
Тўй қилади ўзбегим.

Тўйи бўлар бошқача,
Шавла, шўрва, ошгача,
Кирар кекса, ёшгача,
Тўй қилади ўзбегим.

Сўйилар қўчқор, бузоқ.
Бериб кўпкари, улоқ,
Савобга қўйиб тузоқ,
Тўй қилади ўзбегим.

Урф-одатдан дарс олиб,
Чор атрофга жар солиб.
Поёндозу зар солиб,
Тўй қилади ўзбегим.

Тўйболани ўстириб,
Суннат қилиб, кестириб,
Хофизга пул қистириб,
Тўй қилади ўзбегим.

Суннат тўйми, эшик тўй,
Никоҳ тўйми, бешик тўй.
Тўй қилишни унга қўй,
Тўй қилади ўзбегим.

Баҳру дилинг очади,
Ғам-андуҳлар қочади.
Топганини сочади,
Тўй қилади ўзбегим,

Ошинганда мол қилар,
Қўй қилади ўзбегим.
Семиртириб сотибоқ,
Тўй қилади ўзбегим.

Нўмонжон ЗОҲИД,
Қува тумани

⭕️ Каналга обуна бўлинг👇👇👇
https://t.me/mushtumjurnali

Фридрих НИЦШЕ:

Одам қанча камгап бўлса, кўп ақлли гапира бошлайди

                                               * * *
Инсоннинг бахтли ёки бахтсизлигига ташқи муҳит эмас, аввало, унинг фикрлари сабабчи. У фикрларини бошқариш асносида бахтини ҳам бошқаради.

                                                    * * *
Мени ўлдиролмайдиган нарса менга куч бағишлайди.

                                                    * * *
Мен фисқ-у фасод сўзлайдиганларни сира тушуна олмайман. Агар кимнидир сўз билан тузлаш керак бўлса, у ҳақда озгина ҳақиқатни гапириш кифоя эмасми?
                                                    * * *
Кимки махлуққа қарши курашаётган бўлса, бора-бора ўзи ҳам махлуққа айланиб қолиши мумкин. Ахир, зулматга қанча узоқ термулсанг, зулмат ҳам сенга шунча вақт термулиб туради.

                                                    * * *
“Шундай бўлганди”, – деди Хотира.
“Бундай бўлиши мумкин эмас!” – деди Ғурур.
Хотира енгилди.
                                                    * * *
Баъзида одамлар пуч хаёлларига путур етмаслиги учун ҳам ҳақиқатни эшитишни исташмайди.
                                                    * * *
Изтироблардан қутулишнинг икки йўли бор: бевақт ўлим ёки бениҳоя муҳаббат.
                                                    * * *
Агар астойдил ҳаракатга киришган бўлсангиз, иккиланмаслик учун эшикни маҳкамлаб ёпинг.

Асил БЕК таржимаси

Telegram  |  Instagram |  Youtube |  Facebook

САҲАРХАНДА

Қорбобога хат:
— Салом, қари тўнка. Мен сени неча йилдан бери ҳар янги йил оқшомида кутардим. Мана бу йил ҳам кутдим, келмадинг. Энди сенга умуман ишонмайман. Ҳурмат билан: Тешавой, 47 ёш.

* * *
1. Ҳар бир инсон умрида бир мартта куяди. Ё қуёшдан ё севгидан.⠀
2. Ўзига бино қўйган одамлар шуни билсин-ки, биз ҳам уларга қўйганмиз.⠀
3. Мени мутлақо яхши билмайдиган инсонларни мен ҳақимдаги фикри мени ҳам мутлақо қизиқтирмайди!⠀
4. Ҳадеб ортимдан гапираверманг! Шундоқ ҳам ўзим ҳақимда фикрим жуда баланд!⠀
5. Ҳар ким индамас бўлиш ҳуқуқига эга.⠀
6. Ухланг! Сизни буюк ишлар кутмоқда.⠀
7. Атрофингдаги душманларингни хурсанд қилиш учун ҳар-ҳар замонда ўзингни сиқилган қилиб кўрсат!⠀
8. Соғлом одам бу — яхши текширилмаган одам!

Telegram  |  Instagram |  Youtube |  Facebook

Эркин ВОҲИДОВ,
Ўзбекистон халқ шоири

МАТМУСАНИНГ УЙЛАНИШИ

Сафар қилди Матмуса
Олисдаги шаҳарга.
Ул шаҳарда йўликди
Бир ҳур пари-пайкарга.

Бўйдоқ эди Матмуса,
Узоқ турмай ўйланиб,
Қишлоғига қайтди у
Ул санамга уйланиб.

Ҳеч гап эмас бахт келса,
Айтар омад деб буни:
Уч ой ўтмай жононнинг
Яқинлашди ой-куни.

Ҳамма ҳайрон, ҳамма лол:
«Биз бир йилча кутардик,
Матмусанинг хотини
Чиқиб қолди ударник».

Не экан деб, шошилиб
Зарбдорликнинг бу сири,
Чопиб келди суҳбатга
Донишгазет мухбири.

«Биз ҳам четда эмасмиз,
Биз ҳам шерик меҳнатга»,
Деб Матмуса тиржайиб,
Қўшилади суратга.

Эртасига бу хабар
Тарқаб кетди ҳар ёққа.
Сарлавҳа ҳам чиройлик:
«Илғор ўрнак — қишлоққа».

Хат ёғилар эрлардан:
Ташаббусни қўллаймиз!
Хотинларни тажриба
Алмашишга йўллаймиз!

«Алвон-алвон шиорлар
Пайдо бўлар ҳар жойда:
«Янгиликка — катта йўл!»
«Тўққиз ойни — уч ойда!»

Ҳайъатларда кеккайиб
Яйраб юрар Матмуса.
Биз ундоқ, биз бундоқ деб
Сайраб юрар Матмуса.

Алқисса шу — баъзида
Шундай бўлиб қолади —
Биров қилиб меҳнатни,
Биров обрў олади.

МАТМУСАНИНГ ТАНДИРИ

Матмусага бир куни
Хотини: «Ҳой, эр, — деди.
Ҳаммада бор, менга ҳам
Тандир қуриб бер», деди.

Пишиқ эди Матмуса,
Бошга қўйиб кўлини,
Ўйлаб топди энг арзон
Тандир қурмоқ йўлини.

Деҳқончилик — сомон, жун,
Лой қоришни билади.
Ўзи тайёр қолип-ку,
Нега пул сарф қилади?

Лойни қорди, ишлатиб —
Занг кетмону пақирни.
Сўнг офтобга чўк тушиб,
Болаларни чақирди.

Қийқиришиб болалар
Атрофида чопдилар.
Қорни бўйни аралаш
Лойшувоқни ёпдилар.

Бундоқ тандир бўлмаган,
Йўқдир ҳеч бир китобда.
Тандирини Матмуса
Қуритади офтобда.

Қотган сари танда лой,
Ҳар бир мўйи жимирлар.
Чиғаноқ қурт сингари
Фақат боши қимирлар.

Кўп қийналди Матмуса,
Мард эмасми — чидади.
Тандир тайёр, энди мард
Ундан қандоқ чиқади?

Пилла ёрар капалак,
Қил суғрилар хамирдан.
Лек Матмуса чиқолмас
Ўзи қурган тандирдан.

Етар етти қўшнига
Унинг нола-хониши.
Маслаҳатга йиғилар
Қишлоқ аҳли дониши.

Ким дер: Э воҳ, бечора,
Ким дер: Кўринг тақдирни.
Баҳс бошланди — масала:
Бутун олмоқ тандирни.

Охир деди бош ҳакам,
Чимирганча қошини:
— Бир чора бор: арраланг
Матмусанинг бошини.

Майли, деди Матмуса,
Рози бўлмай нетайин,
Билмадинглар қадримни,
Ҳамманг жинни, бетайин.

Кессангизлар бошимни,
Мен ниятга етарман.
Бошим олиб бу ердан
Бирор ёққа кетарман.

Telegram  |  Instagram |  Youtube |  Facebook