Guliston shahrida tabiiy gazdan noqonuniy foydalangan korxonalar aniqlandi

“Hududgaz Sirdaryo” gaz taʼminoti filiali komplayens nazorat tuzilmalari, tuman gaz taʼminoti boʻlimi xodimlari va huquq-tartibot organlari hamkorligida Sirdaryo viloyatining Guliston shahrida oʻtkazilgan reyd tadbirlari vaqtida qonunbuzilish holatlari fosh etildi.

Xususan, shaharning “Namuna” MFYda joylashgan “Sh. A. H.” MCHJga qarashli binoda gazdan foydalanish holati koʻzdan kechirilganda isteʼmolchi elektron gaz hisoblash uskunasiga oʻrnatilgan bir martalik tamgʻani oʻzboshimchalik bilan olib tashlab, tabiiy gazdan noqonuniy foydalanib kelayotgani aniqlandi. Holat yuzasidan dalolatnoma tuzilib, gaz sarfi qayta hisob-kitob qilindi va 212 million 710 ming soʻmlik zarar aniqlandi.

Shu kabi “Sohil” MFYdagi “A. F. M.” MCHJga qarashli parrandachilik fermasida ham xuddi shunday qonunbuzilish holati qayd etildi. Noqonuniy holat boʻyicha qayta hisob-kitob amalga oshirildi va 57 million 743 ming soʻmlik zarar hisoblandi.

Yuqoridagi holatlar boʻyicha barcha hujjatlar huquqni muhofaza qiluvchi organlarga yuborildi.

Telegram | Facebook | Instagram | YouTube | X | Veb-sayt