O‘zbekistonda koronavirusga chalinganlar soni sakkiz nafarga yetdi
O‘zbekistonda koronavirus infeksiyasini yuqtirib olish bilan bog‘liq holatlar soni sakkiztaga yetdi. Bu haqda Sog‘liqni saqlash vazirligi huzuridagi Sanitariya-epidemiologik osoyishtalik agentligi ma’lum qildi.
Avvalroq, 15-mart kuni bir muddat avval Fransiyada bo‘lib qaytgan o‘zbekistonlik ayolda koronavirus aniqlangani haqida xabar berilgan edi. Keyinchalik uning o‘g‘li, qizi, turmush o‘rtog‘i va nevarasida ham virus aniqlangani ma’lum qilingan edi.
Olib borilgan tahlil natijalariga ko‘ra, Sog‘liqni saqlash vazirligidan ma’lum qilishlaricha, “ushbu bemor bilan muloqotda bo‘lgan qarindoshida ham koronavirus qayd etilgan”. Qarindoshning aynan kim ekanligiga rasmiy axborotda aniqlik kiritilmagan.
Bundan tashqari, 14-mart kuni Uzbekistan Airways’ning London—Toshkent reysida kelgan O‘zbekiston fuqarosida ham koronavirus aniqlangan. Vazirlik axborotida ham, agentlik bayonotida ham fuqaroning jinsiga, u bilan bir reysda necha kishi kelganiga, ularning holati va ahvoliga aniqlik kiritilmagan.
Qayd etish joiz, avvalroq 15-mart kuni soat 5:15 da Uzbekistan Airways’ning Istanbul—Toshkent reysida kelgan O‘zbekiston fuqarosida ham koronavirus qayd etilgani haqida xabar berilgan edi. Shunday qilib, O‘zbekistondagi sakkiz bemorning olti nafari bir xonadonda bo‘lgan shaxslar, yana biri Turkiyadan, boshqasi Buyuk Britaniyadan kelgan fuqarolar.
“Bemorlar bilan muloqotda bo‘lganlarning ro‘yxati olinib, ularning salomatligi ustidan ham tibbiy nazorat o‘rnatildi”, — deyiladi Sog‘liqni saqlash vazirligi axborotida.
Manba Daryo
#vahimasizkarantin #карантинбезпаники
@koronavirus_kasallik
