O‘g‘il bolalarga o‘qituvchilik kasbini tanlashni tavsiya qilmayman. Bu men uchun og‘ir so‘z, ammo shu kunlarga guvoh bo‘lgan 20 yildan ortiq ustoz sifatida shularni aytishga majburman. Kasbimizda hech qanday imtiyoz yo‘q. Vaholanki, bosh qomusimizda hamma teng huquqli deb yozilgan. Harbiylar, ichki ishlar xodimlariga imtiyoz, turar joylar beriladi, farzandlariga OTMlarga kirish uchun imtiyoz va yengilliklar beriladi, nasib qilsin. Lekin, ularni o‘qitgan oddiy maktab o‘qituvchisiga esa hech narsa yo‘q. Afsus. Kino san'atini oling: eng yaxshi erkak aktyor, eng yaxshi ayol aktyor, eng yaxshi ikkinchi darajali rol, eng yaxshi epizodik rol, eng yaxshi debyut rol va h.k. O‘qituvchilarda ham bo‘lsin: eng yaxshi sinf rahbar, eng yaxshi boshlang‘ich fan o‘qituvchisi, eng yaxshi mutaxassis (faoliyati uch yilgacha bo‘lganlar), eng yaxshi keksa o‘qituvchi (50yoshdan keyin), eng yaxshi ayol o‘qituvchi, eng yaxshi erkak o‘qituvchi...
Eh, gapiray, desam gap ko‘p. Hech e'tibor berganmisiz, kasalxona, hokimiyat, bank, prokuratura binolari oldida avtomashinalar turar joyi bor. Avtomashinalar qator turadi. Lekin birorta maktab oldida bular yo‘q. Bo‘lsin ham demayman. Chunki o‘qituvchilarning birortasi ro‘zg‘oridan ortib, kredit bilan bo‘lsada, mashina ololmaydi. Bu aniq. Aniq ayta olaman, maktab o‘qituvchilarining nari borsa 5% da mashina bordir (bizda 200dan ziyod o‘qituvchilar bor, shulardan ikkitasida mashina bor. Aytishga ham uyalasan kishi). Erkak o‘qituvchilar 9 nafar. Mana sizga baho. Balki bu fikrlarim kulgilidir, ammo haqiqat.
Xizmat yuzasidan hokimiyat, banklarga boramiz. Chiroyli binolar, ayniqsa, qishda issiq. Chiqqing kelmaydi. Xodimlari yengil kiyimlarda yurishadi. Havasim keladi. Maktablarda esa bechora (haqiqatda bechora u) o‘qituvchilar palto, kurtka bilan dars o‘tamiz. Mazza qilibmas, majbur bo‘lib. Bolalarga rahmimiz keladi. Hazillashib bahor yaqin, deb qo‘yaman ba'zan. Qattiq sovuq kunlari "aqlli" ota-onalar bolalarini maktabga yuborishmaydi va to‘g‘ri ham qilishadi. Men ham shunday qildim, garchi o‘zim o‘qituvchi bo‘lsamda. Chunki ota-onaga farzandining avvalo sog‘ligi muhim. O‘sha mashhur binolarning remonti ham chiroyli.Tashqi fasadlari odamni o‘ziga jalb qiladi. Kechalari binoning nomi chiroqlar bilan yoritiladi. O‘sha yerda ishlaydigan xodim o‘z oilasi, farzandlari bilan o‘tib qolsa, tungi chiroqlar binoni yanada go‘zal va jozibali qilib ko‘rsatadi. Farzandlari esa otasi bilan faxrlanadi. Balki bu arzimas fikrdir, ammo bola qalbida, bola dunyosida bu katta aks-sado beradi va kelajakda u ham ota kasbini egallashni orzu qiladi. Endi sekin maktab tomon o‘ting. Faqat ehtiyot bo‘ling. Qorong‘uda qoqilib ketmang. Qo‘shnining iti sizni hurkitmasin. Bunda qanday qilib farzand ota kasbini egallsin...
©
Erkin Ismatovich🇬🇧
@uzteachers 🇺🇿
