Biz yuz xil taom pishirishni biladigandan ko'ra hech bo'lmasa 40 ta hadisni o'rgangan ayol-qizlarga muhtoj ekanimizni unutdik, biz turfa shirinliklarni zumda tayyorlay oladigandan ko'ra, turmush o'rtog'i yoki farzandi xulqida biroz toyilish sezganda bir zumda chora topa oladigan ayol-qizlarga muhtojligimizni unutdik. Agar ayollar turfa taomlarni pishirsa-yu isrofga yo'l qo'ysa, taom pishirganda aytiladigan duoni, oshxona odoblarini bilmasa... Bemor bo'lgan farzandiga nima taom foydali yoki zararligi haqida bilimga ega bo'lmasa buning nima keragi bor?!

Sahobiya onalarimiz haqidagi hadislarning birortasida ularning ming xil pishiriq pishirishlari, turfa taomlarni o'rganganlari haqida ma'lumot ko'rmaganman. Lekin ularning zakiyliklari, farosatlari, ilmlari haqida bir olam ma'lumotlar bor. Chunki ularning g'ami oshqozon bo'lmagan, chunki sahobiylar nafslari bilan emas, qalblari bilan sevishgan.
Erkaklar haqiqatdan oshqozon bilan sevsa, dunyo oshpaz qizlarga to'lib ketardi. Sunnatlardan xabari bor, Rosululloh Sollallohu alayhi vasallamning xislatlaridan o'rnak olib yashashga intilgan, yeyishidan maqsad faqat Robbisining rizosi ekanini unutmagan erkaklar talqon yesa ham rafiqasini sevaveradi...