Ўзбекистон Республикаси Самарқанд вилоятининг Каттақўрғон тумани ва ХХР Ҳенан провинсиясининг Женжоу шаҳри ўртасида дўстлик алоқалари мустаҳкамланмоқда.

Женжоу шаҳар маъмурияти биносида Каттақўрғон туман делегацияси учун навбатдаги учрашув ташкил этилди. Учрашувда Каттақўрғон туман ҳокими Ж.Насриддинов Женжоу шаҳар ҳокимининг ўринбосари Ма Чжифен билан икки томонлама дўстлик алоқаларини янада мустаҳкамлаш юзасидан муҳокамалар ўтказди. Шунингдек, Женжоу шаҳар ҳокимлиги ва "СUS GROUP" компанияси ташаббуси билан Женжоу ривожланиш зонасида ташкил этилган "Zhengzhou-Kattakurgan investment and trade fair" форумида туманнинг инвестицион ва экспорт салоҳияти намойиш қилинди.

Форумда Ўзбекистонда янги лойиҳаларни амалга ошириш истагида бўлган 100 дан ортиқ Хитой компаниялари вакиллари иштирок этди. Натижада, 16 та корхона билан туманда истиқболли лойиҳаларни амалга ошириш бўйича дастлабки англашув битимлари имзоланди.

Шунингдек, ҳозирги вақтда Каттақўрғон туман Инвестициялар, саноат ва савдо бўлимида фаолият юритган Ғ.Мажидов Хитойнинг тажрибасини ўрганиш мақсадида Ҳенан университетида таҳсил олмоқда.