Otaxon muzey tomonidan viloyatimizda yangi muzeylar tashkil etilishga koʻmak koʻrsatildi.

Sayyohlar va mahalliy aholi eʼtiborini tortadigan turistik-maʼrifiy maskanlardan biri muzeylardir. Muzeyimizda eksponatlar soni yildan-yilga oshib, muzey fondi boyib borayapti. Birgina oʻtgan yilda “Milliy merosga mening hissam” aksiyasi doirasida aholidan 180 ta tarixiy-madaniy qimmatga ega boʻlgan ashyolar toʻplandi. Ularning koʻpchiligi XVIII-XIX asrlarga tegishli.

Jumladan, paranji, jelakbosh, nimcha kabi ayollar kiyimlari, erkaklarga oid salla, yaktak, hattoki paytava bilan birga saqlangan maxsi-kalishlar vaqt oʻtib moddiy va maʼnaviy mulkka aylanib bormoqda. Shu oʻrinda paytavaning ham oʻzbek xalqi hayotida tutgan oʻrni haqida gapirsak. U paypoq oʻrniga ishlatilib, oyoqni quruq va issiq saqlagan. Tabiiy matodan tayyorlanib, oyoq hidlanishi va turli zambrugʻlarning yuqishidan himoya qilgan. Paypoqlarning muomalaga kirishi va oyoq kiyim turlarining koʻpayishi bilan paytava oʻz-oʻzidan muomaladan chiqarilgan.

Bu kabi maʼlumotlar ayniqsa, xorijlik sayyohlar uchun qiziq. Yaqinda muzeyimizda boʻlgan AQSHning Virjiniya shtatidan sayyoh Benjamin Nori erkaklar liboslariga ahamiyat berib, ularning tabiiy matodan tayyorlanganiga hamda kundalik hayotda qulaylikni taʼminlaganiga eʼtibor qaratdi.

Muzey xodimlari tomonidan yoshlarimizni boy tariximizga qiziqtirish, ularda tasavvur hosil qilish uchun qator targʻibot tadbirlari oʻtkazilmoqda. Maktabgacha taʼlim tashkilotlari, umumtaʼlim maktablarida 40 ga yaqin koʻrgazma va davra suhbatlari oʻtkazish orqali yoshlarni muzeyga jalb qilish, yurtimiz tarixi haqida maʼlumotlarini boyitishni maqsad qildik.

Bundan tashqari joylarda kichik va mahalliy muzeylar tashkil etishga amaliy yordam koʻrsatib kelinmoqda. Oʻtgan yili Forish tumanida mehnat faxriysi Bektemir Toshpolov tomonidan oʻlkashunoslik tarixi muzeyi tashkil etildi. Shuningdek, Jizzax shahar prokuraturasi va viloyat musiqali drama teatri muzeylarining yuzaga kelishiga ham katta hissa qoʻshdik. Bunday hamkorlik yurtimiz va sohalar rivojlanish tarixini koʻrgazmali vositalar yordamida tiklash imkonini beradi.

Yurtdoshlarimiz orasida muzeylarga sayohatga qiziqish ortib borayotgani quvonarli. Oʻtgan yilda viloyatimizning olis tumanlaridan, xorij davlatlaridan 1000 nafardan ziyod tomoshabinlar kelishdi. Bu yil ham ular safini oshirish, yoshlarni keng jalb qilish borasida targʻibot ishlari davom ettirilmoqda.