Jizzax davlat pedagogika universiteti hududida yangi bunyod etilgan 600 oʻrinli talabalar turar joyi hamda qaytadan rekonstruksiya qilingan axborot-resurs markazi foydalanishga topshirildi. Ochilish marosimida universitet rektori, professor Shavkat Sharipov soʻzga chiqib, barchani qutladi.

Bugunga kelib universitet tasarrufidagi talabalar turar joylari soni 3 taga yetkazildi. Yangi barpo etilgan 4-sonli talabalar turar joyining binosi yetti qavatdan iborat boʻlib, talabalar yashashi uchun barcha sharoitlar yaratilgan.

–Zamonaviy loyiha asosida qad rostlagan talabalar turar joyida oshxona, yangi darsliklar, badiiy-ilmiy va maʼrifiy adabiyotlar bilan boyitilgan maʼnaviyat hamda , zakovatchilar xonasi, axborot kommunikatsiya texnologiyalari boʻyicha bilimlarni oshirish uchun eng zamonaviy turdagi kompyuterlar bilan jihozlangan xonalari yoshlar ixtiyoriga topshirildi,– dedi universitet axborot xizmati rahbari Gulchehra Sharipova. –Bugungi yoshlar ertangi kun bunyodkorlaridir. Shu sababli barcha harakatlar talabaga keng imkoniyatlar yaratishga qaratilgan.

Talabalar turar joyining ochilish marosimida soʻzga chiqqanlar bugungi yoshlarga yaratilayotgan imkoniyatlar va zamonaviy sharoitlar yanada yaxshi taʼlim olishlariga, Vatanimiz ravnaqi uchun oʻzining munosib hissasini qoʻshishlariga ragʻbat ekanligini taʼkidlab oʻtishdi.

Jizzax davlat pedagogika universiteti Axborot-resurs markazini rekonstruksiya qilish boʻyicha loyiha smeta hujjatlari “GOLD PROJECT SERVICE” MCHJ tomonidan tayyorlangan. Yangi taʼmirdan chiqqan markaz mamlakatimizda kutubxonachilikning soʻnggi yutuqlari asosida bunyod etilgan anʼanaviy, virtual hamda elektron kutubxona xizmatlarini koʻrsatish orqali talabalar va professor-oʻqituvchilarga xizmat koʻrsatuvchi maʼrifat markaziga aylanishi shubhasiz. Markazda axborot-kommunikatsiya vositalarining soʻnggi yutuqlari mujassamlashtirilgan boʻlib, unda mutolaa zallari, muhokama va kompyuter xonalari, maʼlumot almashish imkonini beruvchi video tarmoq,WI-FI mavjud.

Ochilish marosimidan soʻng mehmonlar yangi foydalanishga topshirilgan binoda yaratilgan sharoitlar bilan tanishdilar. Tadbirda viloyat prokurori Baxtiyor Ibroximov ishtirok etdi.