Хусусан, Зомин туманида ҳам талайгина муаммолар борлигши аниқланди.

Туманнинг Шароф Рашидов маҳалласи ҳудудидаги икки қаватли уйлар олдига киришдаги йўл шу атрофдаги ичимлик суви қувуридан сизиб чиқаётган сув натижасида ботқоққа айланган, ичимлик сув қувуридаги носозлик пайдо бўлганига бир ҳафта бўлишига қарамасдан мазкур носозлик ханузгача бартараф этилмасдан қолмоқда, ичимлик суви исроф бўлмоқда, уйларнинг фасад қисмлари ҳам абгор ҳолда, болалар майдончалари талаб даражасида эмаслиги бир ёқда турсин, чиқиндига тўлган идиш ҳам шу жойга жойлаштирилган, 11-уйнинг олдида ичимлик суви доимий оқиб, исроф бўлмоқда, ички кўчалар ҳам бир аҳволда, уйлар олдида ташландиқ бинолар қолдиқлари мавжуд бўлиб, қаровсиз ҳолда, маҳалланинг “Парчаюз” кўчасидаги маҳалла биносининг ҳолатини ҳам қониқарли деб бўлмайди, маҳалла биносининг кириш қисмида 2024 йилги ёзувлар акс этган баннерлар осилиб турибди.

Парчаюз кўчасида жойлашган газ тақсимлаш қурилмасининг ҳолати анча вақтдан буён хизмат кўрсатилмаган.

Марказда жойлашган Зомин деҳқон бозори атрофидаги ҳолат эса жуда ачинарли, ирригация ариқлари чиқинди билан тўлган, “Корзинка”, деҳқон бозори ва “Қўрғон” маҳалласидаги кўп қаватли уйлар олдидаги чиқинди тўплаш учун мўлжалланган идишлар чиқиндилар билан тўлган.

“Қўрғон” маҳалласидаги кўп қаватли уйларнинг ховли қисми ҳам ачинарли ҳолатда, ариқлар чиқинди ташлаш жойига айлантирилган, ҳудуд ободонлаштирилмаган, болалар майдончаси эса савдо қилиш жойига айлантирилган, яшил майдонлар техникалар ҳаракатидан, бир аҳволга келиб қолган.

“Қўрғон” маҳалласи Буюк ипак йўли кўчасидаги кўп қаватли уйлар ёнидаги қурилиш биносининг атрофи чиқиндилар билан тўлган.
Ғофур Ғулом маҳалласидаги 8-Давлат мактабгача таълим ташкилотининг йўлаклари таъмирталаб, ҳудуд ободонлаштирилмаган, болалар майдончаси оғир аҳволда, болалар майдончаси олдида авария ҳолатидаги ёғоч электр устуни мавжуд, биноларнинг том қисмларидан қурилиш материаллари осилиб турибди.