Jizzax shahar adliya boʻlimi majlislar zalida “Ijro intizomi—samaradorlik omili” mavzusida seminar boʻlib oʻtdi. Unda viloyat hokimligi, shahar va tuman hokimliklari boʻlim boshliqlari, mutaxassislari, adliya idoralari vakillari va OAV xodimlari ishtirok etdilar.

Seminarda davlat organlari va tashkilotlari, mahalliy hokimliklar tomonidan Prezident farmon va qarorlari,qonunchilik hujjatlari hamda topshiriqlar ijrosini taʼminlash, ish yurituvini toʻgʻri tashkillashtirish, bu borada aniqlangan kamchiliklarni bartaraf etish chora-tadbirlari haqida soʻz bordi.

Tadbirni boshqarib borgan viloyat hokimining birinchi oʻrinbosari Zafar Azimov viloyatda ijro intizomini mustahkamlash, hujjatlar bilan ishlash, ijro nazoratini tashkil etish, “Ijro.gov.uz” ijro intizomi idoralararo yagona elektron tizimi orqali kelib tushgan qonunchilik hujjatlari va topshiriqlar ijrosining tizimli nazoratini amalga oshirish borasida amalga oshirilayotgan ishlar va respublika ishchi guruhi tomonidan oʻtkazilgan oʻrganishlar natijalari haqida gapirdi.

Yigʻilishda respublika ishchi guruhi aʼzolari tomonidan mamlakatimiz Prezidentning 2021-yil 10-fevraldagi “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida”gi Farmoni ijrosini taʼminlash, hujjatlar va topshiriqlar bajarilishini taʼminlash yuzasidan olib borilayotgan ishlarda “Ijro.gov.uz” elektron tizimining ahamiyati, ijro intizomini taʼminlashda yoʻl qoʻyilayotgan kamchiliklarni tugatish haqida fikr-mulohazalar bildirilib, muhim tavsiyalar berildi.

Kun tartibidagi mavzu yuzasidan viloyat adliya boshqarmasi boshligʻining birinchi oʻrinbosari Bunyod Ikromov, viloyat hokimligi ijro nazorati boʻlimi boshligʻi Latifjon Yoqubov maʼruzalari tinglandi.

Yuzma-yuz muloqot tarzida oʻtkazilgan tadbirda oʻtgan yilda amalga oshirilgan ishlar, aniqlangan kamchiliklar va ularni hal etish boʻyicha choralar muhokama qilindi. Ijro intizomi boʻyicha masʼul xodimlarda yuzaga kelgan muammolar va ularning yechimlari boʻyicha tahliliy fikrlar, takliflar bildirildi.