Avtobus bekatdan jo‘nadi,
Yugurdim,
Yiqildim,
Kechikdim.
O endi kelmaydi yuzimni,
Ugirdim,
Siqildim,
Ichikdim.

Bahorni sog'inib bir umr,
Xazonli kuzlarga ko‘nikdim.
Mehribon yor istab, qandayin
Bag‘ritosh go‘zalga yo‘liqdim.

Bilmadim, bilmadim aslida
Hayotim to'ldirdi nimalar.
Ertakdir qadimgi hey oʻsha,
Alvon rang yelkanli kemalar.

Men xudbin o‘zimga baxt istab,
Kimsasiz shaharda iziqdim.
Kelmaysan...
Bormayman bir umr
Tuproqdor so‘qmoqday to‘ziqdim.

Ne bo‘lar umidning oxiri,
Zulmatdan zulmatroq kechalar.
Avtobus...
Sen xomush,
Men xomush,
Charaqlab ketadi ko‘chalar.

Ko'ngilni keng qildim... ba Xudo,
Toshqin bir daryoday to‘liqdim.
Taqdirim bo‘lmagan hech kimim,
Taqdirmi?..
Men senga yo‘liqdim.

Avtobus...
Men unga chiqmayman,
Sen esa yugurgin, kechikkin.
O endi baxt olib bormayman,
Men kabi siqilgin, ichikkin.

○ Sanjar Mashriqiy